笑婦心事：香港人冇啖好食喇！

某天和新節目拍檔農夫的C君在尖沙咀工作完後，想找點吃的。C君說：「轉彎有間小食店」，我說：「篤串燒賣都好噃」，於是二人向樂道與海防道街角、頗具規模的一間小食店進發。我依稀記得小食店的名字有個「津」字，每次餓肚子又趕時間時總能在那裏隊串魚蛋整底雞蛋仔填肚，還吃得津津有味。走着走着，遠遠望見小食店對面原本那間相機舖變成了裝潢華麗的太＿珠寶鐘錶，心想：「嘩電子產品都做唔住？嗰間做咗咁多年嘅小食店會唔會都做唔住？」放眼小食店的位置，開口中！只剩下鐵閘和多個「招租　電陳小姐」的牌子。兩位空肚人士惟有沿海防道繼續尋找舌尖上的尖沙咀。「前一個街口有間『些粉』，有嘢食喇啩？」可是，太＿珠寶鐘錶之後，只見周＿福、米＿站、卓＿化妝品、藥房、找換店和周＿福（我沒有打錯，因為短短一條海防道真的有兩間周＿福），就是沒有小吃店。兩件原本肥但快要餓到瘦的男女，開始餓到失常：「唔係喇，魚蛋就冇，手錶有咁多，不如食手錶喇。」「都好喎，我去米＿站揀個『趴打』手袋食吓，順便去周＿福搵個吊墜吔。」「我有啲頸渴，去卓＿搵支香水飲吓先。」只是想找點吃的也被鋪天蓋地的消費品店淹沒，香港人冇啖好食了。