Vega IRON 鐵框「幼」惑

Vega IRON A870 $5,380

提起韓廠手機，大家來來去去淨係講得出S同L兩個品牌，不過近年就有股新勢力愈做愈勁，所說的就是韓國第三大手機廠Pantech。這品牌向來玩創新，繼先前的Vega N°6玩機背觸控板之後，2013旗艦作Vega IRON A870就玩幼，機身左右兩邊只有2.4mm，望落恍如無邊，外觀超型；而且仲採用一體成形的金屬邊框，造工激讚，這股韓Phone隨時吹得起！

Vega IRON A870 $5,380

隨機有兩粒2,150mAh電池，夠你玩足一日。

8.8mm不算激薄，不過睇埋邊位的髮絲紋，就會覺得造工好正。

七色LED提示燈實用又靚仔，設計有心思。

可用香港4G網絡，串流、上網都不會窒。

以火柴比較，就知2.4mm有幾幼。

機面冇任何實體鍵，白色配色都幾簡約。

機背殼都有心思，邊位玩斜切，不致太單調。

同樣有個5吋芒，Vega IRON(右)比Xperia Z細部得多。

可以在鎖面畫個快捷鍵指令出來，純粹好玩為主。

採用Qualcomm 600處理器，行Benchmark當然夠高分。

「Mini Window」玩多工作業，勁在開多幾個窗仔都不窒機。

內置「Simple Mode」，介面變成彩色大方格，好易上手。

「T Mode」只保留撥號、SMS等基本功能，幫你慳電。

《Camnote》程式幫你將文字背景勾走，仲可以於上面寫筆記。

試播高清影片，色彩層次分明，720p畫面都好清。

硬淨鐵框

近年不少手機為了偷薄、整輕，好多都採用塑膠物料，手感自然麻麻。今次Vega IRON就用回紮實的金屬物料，邊框更採用一體成形設計，表面更加入髮絲紋處理，十足一個Bumper。據廠商表示，金屬邊框不單止有型，而且仲夠硬淨，邊角撞地應無大礙！另外，就連邊框內的電源鍵、音量鍵都齊齊換上同Pattern物料；機身右上角仲有一個的骰七色LED提示燈，來電或充電都會着燈，連細節都做到足，韓仔果然有計！

激幼2.4mm

新機另一亮點就是其「無邊」設計。以往大家用開的手機例必左右有條粗邊框，Vega IRON就特別將機身左右兩邊縮窄到2.4mm，屏幕佔機面總面積超過75%；換言之用盡機面空間，亦直接令機身變得更修長。即場搵同樣5吋芒的Xperia Z拍埋一比，此機明顯較短身兼窄身，拎上手舒服得多。此外，其屏幕亦改用In-Cell Display技術，官方表示可以提升屏幕清晰度；實測色彩還原度、細緻度都好高，就算解像度只係得720p都一樣夠撐。

小視窗玩多工

雖然係水貨機，不過今次到港的就支援香港1,800MHz 4G頻譜，兼容不成問題。另外亦搭載現今最強的硬件規格，包括1.7GHz四核心處理器、2GB RAM以及1,300萬像素，仲可以外加microSD卡擴充容量。軟件方面，廠商繼續為Android 4.1.2系統加入自家介面，操作流暢，亦有不少實用功能，好似「T Mode」介面以及「Mini Window」，前者將介面簡單，只得撥號、SMS等基本功能，等手機不夠電時可以慳住使；後者則可以將音樂、影片播放器、計算機、撥號鍵盤等功能變作小視窗，隨時彈出畫面，都幾好使好用！