人氣Cocktail
Margarita (加強版)
以君度橙酒、龍舌蘭酒、青檸汁調成嘅Margarita最受女士歡迎,而為求與別不同,調酒師將所有酒精分量加倍,杯邊沾上一層「鹽霜」,入口酸酸甜甜,非常清爽。

以往蒲友落Bar,通常都只係想同朋友吹吓水、飲吓酒,但近年蒲友愈來愈多要求,落Bar除了飲酒吹水外,仲想有嘢玩、有舞跳,甚至有歌唱。雖然不少場都會盡量滿足客人嘅多樣化要求,但極其量只能精於一瓣,其餘只能勉強過關,除非好似旺角呢間場咁,以Drink、Darts、Dance 3種Style包抄各路蒲友!

人氣Cocktail
Margarita (加強版)
以君度橙酒、龍舌蘭酒、青檸汁調成嘅Margarita最受女士歡迎,而為求與別不同,調酒師將所有酒精分量加倍,杯邊沾上一層「鹽霜」,入口酸酸甜甜,非常清爽。

Darts
Legends Club嘅金字塔形玻璃天窗,格外開揚,鏢友如置身室外掟鏢,感覺與別不同!

Dance
Vegas Club有DJ台、大舞池及U形吧枱,絕對可媲美中環高級夜場。駐場DJ每晚更以不同音樂滿足蒲友。

Drink
Shanghai Club為三場中之首,走高檔路線,場內有多達25款Cocktail任點任飲。

Legends Club有6部鳳凰機,此機特色之處係可以插卡連線同全球鏢友較技,只需$108就可以任飲任掟,勁受鏢友歡迎。

Shanghai Club、Legends Club及 Vegas Club各設不同VIP房,方便大班朋友聚埋玩。

調酒師阿傑話每晚閒閒哋調過千杯Cocktail。

為營造「夜上海」感覺,Shanghai Club擺放了不少復古家具及裝潢,眼前呢部留聲機,係場主Mike搵專人從北京運過嚟!

吧頭上方的垂墜裝飾,閃爍璀璨。

Legends Club有勁多鏢友捧場,同場更有售賣各式軟鏢產品。

Around the World(加料版)
混合龍舌蘭、冧酒、威士忌、伏特加、橙酒及水果甜酒,入口香甜,酒精濃度高,呢杯「加料版」更加入薄荷酒,多添一份冰涼感!

Foxy Lady
駐場Signature Cocktail,成分包括Gin酒、櫻桃拔蘭地、檸檬汁、石榴汁、安格斯特拉苦酒及冰鎮梳打水,口感複雜,酒精濃度頗高,小心飲醉。

據場主Mike表示,為完成「一站式娛樂場」夢想,足足等咗3年先有機會!Mike選址旺角創興廣場19樓開店,原址本來都係經營酒吧,可惜Mike認為空間不足,難以營造不同娛樂風格,惟有等同層另一間酒吧租約完後,一次過將三個舖位租下,才組成現在的Shanghai Club、Legends Club及Vegas Club。

Shanghai 高格調懷舊Feel

三間場合共佔地過萬平方呎,各自主打不同範疇,包括Drink、Darts、Dance三種蒲友至愛元素。當中以Shanghai Club為中心,皆因佢走懷舊高檔路線,場內裝修以「復古」為主題。如天花三排合共18個轉動舞台鏡面球、極粗糙感嘅牛皮梳化及以紅色枱燈「砌」成的牆身等,走進場內,會有種回到80年代的感覺,最啱三五知己摸吓酒杯底吹水,又或自助點歌唱K。調酒師更表示,Shanghai Club之前曾舉辦過多次主題派對活動,例如「迷你裙」、「旗袍」及「懷舊校服」派對,每位跟足Dress Code打扮入場嘅女士,都可享免費任飲優惠,更有神秘小禮物送。而為咗滿足蒲友,三個場都不設散點服務,入場一口價任飲任玩,對於鍾意直落玩足一晚嘅客人嚟講,確係抵玩。

Legends 鏢友任掟任飲

由Happy Hour時段一直旺到打烊嘅Legends Club,則係蒲友最愛嘅掟鏢酒吧,其特色金字塔形玻璃天花頂,將室外夜景一覽無遺。於佔地約2,000平方呎嘅空間內,可容納70多人,另設有一個小吧頭及兩間各可容納20人的K房。

亮點當然係一字排開嘅6部鳳凰機,每日黃昏5時開始就陸續有人排隊入場玩,由Happy Hour時段至晚上9時,所有客人只要畀$108就可以任掟任飲,更包括多款Cocktail、威士忌及啤酒,輕易回本。

Vegas 專業DJ坐鎮

至於三間場中,人氣最勁嘅必屬晚上10時至開舖營業嘅Vegas Club,格局可媲美中環夜場,設有大型舞池、「U」形大吧枱、可容納40人嘅貴賓房,而每晚11時開始,更有駐場DJ打碟助興,音樂類型以Hip Hop、R&B、Pop Dance為主。駐場DJ阿聰話,於旺角區好難搵到好似佢哋音響咁齊、格調高檔嘅DJ場,而且場主更嚴格限定入場人數,以避免人逼人搞到烏煙瘴氣,難怪一啲「MK」味都冇。

Shop Info

地  址:旺角彌敦道601號創興廣場19樓

電  話:2782 2007

網  址:www.facebook.com/VegasClub.LW