港式French Style

每年五月，香港都幾法國。皆因「法國五月」（Le French May）活動一浪接一浪，一連串視覺藝術、音樂、歌劇及電影等由四月中開始，一直玩到六月中。其實即使唔參與「法國五月」，又或者冇財爺咁「中產」，都一樣可以身體力行，喺香港活出French Style。

港式French Style

窮人法蘭西美食（Bon Appetit）

要感受法蘭西之味，最佳方法自是將佢食落肚！中產人士大可品嘗法國大餐，喝Lafite，口啖Belon或Fine de Claire生蠔。而一般打工仔，則可於Tea Time時豪一豪食件Macaron。如小記等窮人，放假時買支廉價白酒加條長法包，走到西九長廊，坐在長櫈上邊野餐邊欣賞吹氣藝術品，幻想眼前的維港就是塞納河，都一樣好寫意。

扮中產睇法式電影（Cinma）

要視覺感受法國，當然要學財爺睇法國電影。唔認識杜魯福、阿倫雷奈、尚盧高達等新浪潮導演都唔太緊要，揀套較大路的《天使愛美麗》，一樣賞心悅目！想感受巴黎靚景？重溫浪漫經典《Before Sunset》或者活地亞倫套《Midnight in Paris》等「法式」電影都一樣得。

法式香頌（Chanson）

用手機聽法式香頌（Chanson）─即係歌曲，有品味的可揀根斯堡（Serge Gainsbourg）、伯金（Jane Birkin）或者Edith Piaf。近期一點，人靚歌甜的Joyce Jonathan或者前第一夫人Carla Bruni亦是好選擇；想再Local一點，就聽將「Je pense a toi」（我想你）讀成「Japan實瓜」的土炮Indie「my little airport」啦！

有文化睇展覽（Exposition）

假日法國人喜歡往公園，攤在草坪曬太陽看書，或者去藝術館睇展覽。喺香港，瞓公園草地分分鐘畀「實Q」趕，較Work的方法是去尖沙咀行吓藝術館、博物館吸收靈氣。但怎樣避開失驚無神、成群出沒的學生或強國遊客才是最難。

學幾句法文（Parler）

要學識用法文流利溝通冇咁易，倒不如學番幾句罐頭式法文。最多人認識莫過於「Bonjour」（你好）、「C'est la vie」（這是生活囉）同「Merci Beaucoup」（多謝），再學多幾句的話，應該會係「Oh lala」（Oh no或Oh dear）、「Ça Va?」（懶熟地問好）、「C'est comme a!」（就係咁囉）!

延伸導讀：幽默讀法式生活

要了解法國文化生活？可以用一個幽默方式去理解。《A Year in the Merde》（《巴黎，賽啦！》）講來自英國的主角被法國老闆挖角去巴黎開連鎖英國茶館，從食、住、行以至交友方面指出英國文化同法國文化的差別，內容笑到碌地。作者之後仲出了續集《Merde Actually》，至於法文中Merde字點解？大家自行上Google Translate翻吓啦！

專家有Say：遠離消費世界

仍在巴黎生活的Zenobeebee覺得法國人生活比起香港人較遠離消費世界：「法國人很喜歡大自然，即使在巴黎市內亦有很多美麗公園，巴黎人動輒花一個下午在公園曬太陽、看書或和朋友聊天；周末又會一家大細去森林或野餐。」另一方面，文化活動在法國人生活裏幾乎是不可或缺，「當受歡迎的展覽快要結束展期時，甚至會在最後展出的3天連續72小時開放讓公眾參觀，像早前龐比度中心的Dali展同巴黎大皇宮的Edward Hopper畫展都是例子。每年10月有名為『La Nuit Blanche巴黎不眠夜』的活動，整個巴黎到處都有展覽表演，無分年齡層面的人都會半夜外出看展覽。」Zenobeebee自問適應力強，但最不習慣是銀行服務：「在法國詢問關於銀行帳單的小事，都一定要回到開戶的分行去，有次我在南法，銀行戶口突被凍結，普羅旺斯分行竟然夠膽死叫我返巴黎問！」