神級手機小米2S港版到手

小米2S $2,499

提起買國產手機，好多人都耍手兼擰頭，皆因設計乏美足陳，機能又唔對辦。不過凡事總有例外，於內地遭網民瘋搶、被外國傳媒激讚嘅小米手機2S最近終於推出港版行貨。新機以超高性價比而聞名，四核心處理器、2GB RAM、800萬像素等堅揪規格之下，竟然以$2,499驚喜價出售，拍埋機能接近嘅GALAXY S4、HTC One一比，足足平超過一半，堪稱係「蔗渣價錢，燒鵝味道」！

小米2S $2,499

可以拆蓋換電，2,000mAh電池勉強用到一日。機身厚達10.2mm，好在145g唔算好重。

800萬像素BSI鏡頭，對焦速度同反應都幾快。

前置鏡頭都有成200萬像素，自拍都夠用。

機面設計簡約，個人就覺得左上角嘅Logo有少許老套。

機面三個輕觸鍵冇背光燈，夜晚比較難睇到；而Home鍵下則設有LED燈作提示之用。

機身比iPhone 5（右）大少少，單手手持都唔算攰。

機背殼採用塑膠物料，手感一般，勝在可以隨時換上另購嘅多色底殼。

就連包裝都玩簡約風，留意火牛寫明係三腳頭。

狀態欄分為提示及快捷功能頁面，有大量快捷鍵，唔使入設定咁麻煩。

試睇網頁，文字唔放大都可以清晰見到，都幾細緻。

長按機面最左嘅功能鍵就會彈出Recent Apps頁面，可以一次過Kill Task。

內置《主題風格》提供大量不同款式主題介面，任君選擇。

屏幕色調仲可以隨時轉換，就番個人習慣。

《AnTuTu》App顯示此機效能超強，只係輸畀八核心版S4，誇張！

拍攝功能唔算好多，不過基本嘅HDR同全景都有齊。

試相
試用微距拍攝模型，對焦、曝光皆準確，而且成像能呈現實物質感。

入手要網購

小米手機2S並冇門市發售，要買只能網購。小記開賣當日即時上官網落「柯打」，三日後已經速遞送上門，效率都算幾高；而且跟機已經有香港標準嘅三腳插頭，本地大SIM卡亦用到，完全兼容。雖然冇門市，不過廠商就提供一年保養，仲特別於旺角開設維修站，香港用家要換貨或者維修都有門路。

簡約機身九色機背

第一眼望小米手機2S，賣相確實唔突出，圓角設計加上黑面白底嘅配色，其實有啲似iPhone；不過拎上手發現邊位、角位都好順滑，做工合格。細心一睇，原來機面虛擬Home鍵下仲有一個細細嘅LED燈，提示、充電時都會着；唯一就係機面三個虛擬鍵不設背光，夜晚好難睇得清楚。若嫌白色底殼太寡的話，原來官網仲可以另購原裝底殼，有黃、綠、橙、紫、桃紅、粉藍等總共九款，每款都係$80有找，玩款襯衫都抵。

超強硬件直逼S4

國產機講設計未必係日韓大廠嘅對手，不過鬥硬件就唔輸蝕。此機就特別採用大廠Qualcomm Snapdragon 600四核心處理器，時脈達1.7GHz，加上有2GB RAM，硬件配置同旗艦機四核心版GALAXY S4同HTC One幾乎一樣。即時就用Benchmark程式跑分，2S竟然有成19,000分，僅輸畀八核心版本嘅GALAXY S4，機能強得驚人！小記試用後，無論睇全高清影片、打機甚至長開10個背景Apps，都依然Load得順暢，表現唔錯。而屏幕則是4.3吋720p質素，而且採用IPS素材，網頁細字都睇得清晰，色彩亦自然；個人用慣大芒機就覺得此機個芒有啲細，不過單手拎機就相對方便，有辣有唔辣啦！

招牌MIUI介面

小米呢個品牌除咗手機抵用而出名之外，其自家開發嘅介面都有唔少Android用家稱讚。小米手機2S就預載全新MIUI V5介面，同一般Android介面唔同，新介面冇咗功能表，所有Apps圖示都擺晒喺主頁，畫面底部亦會長置電話、聯絡人等四個Apps，感覺有少少似iOS。而介面最大特色就係有超多個人化設定，上至主題、Wallpaper，下至解鎖頁面、字體、開機動畫都有得替換，用家只要喺內置嘅《主題風格》就可以免費下載，據講有過千款，啱晒鍾意整色整水一族。