LINE香港版開通 始源Chok住撐！

之前好多人去日本同台灣都狂掃LINE公仔，尤其以「熊大」最受歡迎，原來依家香港都有得換喇！點解？因為LINE幾日前正式喺香港開通，仲出埋香港官方帳號，首先加入嘅有薛凱琪、陳奐仁同Circle K，想追明星動向同攞着數優惠都得。咁仲未夠，LINE香港版電視廣告更搵來韓國人氣偶像Super Junior嘅崔始源拍攝，佢仲嚟埋香港Chok晒樣宣傳LINE，大家無筆者咁幸運見到佢真身都唔緊要，喺LINE遊戲《LINE Play》入面，都可Add「虛擬」始源，入佢間房同佢傾偈o架！

始源拍港版廣告

台灣版LINE電視廣告用桂綸鎂，香港版就用上韓星始源，內容講佢同女友Karen分隔兩地，靠用LINE嘅有趣表情貼圖分享生活點滴。呢個電視廣告來頭不少，皆因係由康城廣告節得過獎嘅John Park執導，不過香港版Slogan「LINE你埋嚟囉」就有少少奇怪，不過有俊男美女就冇乜所謂。至於點解會用韓星拍廣告？其實LINE母公司NHN係來自韓國，然後喺日本推出LINE手機通訊應用程式一炮而紅。目前日全球一億四千萬LINE用戶當中，4,500萬用家就係來自日本，小記去日本時都見到好多少女通街玩LINE，另外台灣都有1,500萭用家o架！

Ap:dd始源玩《LINE Play》

始源今次唔止淨係拍電視廣告撐LINE香港，仲特登飛嚟香港嘅「Hello, Friends in Hong Kong 2013」活動做宣傳，Chok晒樣同可愛到震嘅LINE角色「兔兔」合照。講發布會規模，顯然未及去年七月於東京搞嘅全球活動「Hello, Friends in Tokyo 2012」，不過都有大量可愛嘅LINE紙板公仔鎮場，Cute到暈！

話時話，始源真人的確幾有型，一身黑西裝示人！不過無得入場「膜拜」嘅香港LINE玩家都唔使失望，皆因可以喺LINE專屬遊戲《LINE Play》Add虛擬始源，隨時都可以入始源間房探佢，同佢傾偈兼齊齊做家務，係唔係好溫馨先？記住要用「SJ SIWON」名稱去搵「虛擬」始源出嚟喎，其他叫「Choi Si Won」嗰啲統統唔係佢！而LINE嚟緊仲會加其他明星入《LINE Play》添。

Fiona香港官方帳號開通

除《LINE Play》之外，始源遲啲仲會登陸LINE香港官方帳號，同好多日、韓、台明星睇齊，連本地樂壇小強都勁冧嘅韓星G-Dragon同少女時代都有中、英文官方帳號，隨時都可以接收佢哋嘅靚相同最新消息。而香港版LINE啟用後，港星官方帳號亦都正式開通，首發就有薛凱琪同陳奐仁，截稿時阿Fi嘅Fans人數比Hanjin多；而其他港星亦會陸續加入，追星族務必要留意。明星官方帳號當然吸引，

LINE更加會同所在地嘅企業合作，開設官方帳號發放優惠；日本方面就有無印良品、Lawson等，不過香港玩家Add咗佢哋都無用，因為啲優惠都用唔着；至於香港首個企業官方帳號就係Circle K便利店，佢哋亦剛剛推出換LINE公仔掛飾活動，「熊大」、「兔兔」同「饅頭」都有得換！

可愛貼圖遊戲冧用家

LINE公仔貼圖一向都好多人鍾意，$15可以買到一輯有趣貼圖，小記身邊唔少朋友都一直有幫襯。LINE公仔貼圖更新速度快，同埋好貼近潮流，近期仲好興大玩Crossover，啱啱先推出同日本藝術家村上隆合作嘅公仔貼圖，亦有「Gangnam Style」Psy官方貼圖，推出頭三日可免費下載，小記當然第一時間「單撈」。除核心通訊服務之外，LINE Games亦係一個令人着迷嘅環節，差唔多每隔兩、三個星期，LINE又會推出一款新遊戲，可同LINE Friends一齊比賽，好似Hit到爆、總下載量超過2,000萬嘅《LINE Pop》、下載量逾1,000萬嘅《LINE Bubble》、玩法似《The Sims》嘅《LINE Play》以及近期推出嘅《LINE Tiny Farm》，全部令人玩唔停手！至於會唔會好似日本咁有LINE占卜、LINE天氣等，LINE高層就話唔講得住，總之逐步會喺LINE香港加入新玩法，仲有機會將遊戲本地化咁話。

查詢網址：http://line.naver.jp/zh-hant/