5招精明網購

近年「網購」大流行，事實網站貨品款式多、價錢平，簡單Click幾下就送埋上門，的確方便。不過話分兩頭，網站、貨品琳琅滿目，購買時都有唔少竅門，Follow以下5招，才能醒目買到心頭好！

1.記緊要格價

阿媽教落「貨比三家」，道理同樣適用於網購。

Online Store多不勝數，不時都會出售相同款式嘅貨品，所以揀啱心水貨品時，不妨先記低貨名，再到其他網站格吓價，先會執到平貨。

2.認證分真偽

Shopping最驚畀人呃，網上亦充斥唔少假網、假貨。

所以網購時記住事先Search吓網站口碑，切忌貪平中伏；同時亦可留意網站有冇提供「Customer Certified by bizrate」認證，因為可以睇到世界各地用家對網站嘅評價及評分，自然買得更安心。

3.做會員有着數

唔少大型購物網站都會設立會員制度，建議大家盡快登記。

除咗免卻每次購物時都要輸入一大堆個人資料外，仲可以訂閱網站嘅Newsletter，一有新貨上架、促銷大特價等都會即時e-mail提醒你，方便好多！

4.善用Promotion Code

同門市、街舖不同，網購貨品最佳時機未必係節日前夕，反而係提供Promotion Code嘅優惠時段。

大型購物網不時都會搞優惠活動，只需於落單時輸入Promotion Code，即可獲得折扣。例如美國著名服飾公司J.Crew就不時有折上折或者免運費等優惠，比一般大特價更抵；但優惠一般只有一日甚至幾小時，逾時即結束，記住捉緊時間落「柯打」。

5.運費要識計

要買得醒，運費計算都相當重要。

網購公司大致以訂單或者重量用作運費計算，前者購買多件貨品都只會收取同一價錢嘅運費，同幾個朋友夾埋攤分就最抵；後者則計算貨件重量，一齊落單都未必有So。

而且網購公司一般提供多種運送方法，當中FedEx、DHL等速遞會貴啲，但運送速度較快；相反本地郵政雖然平得多，但運送時間相對較長。

Tips：Check清匯率、貨款

雖然話外國網站經常有筍貨，不過始終遙距操作兼冇得睇實物，所以入手前一定要查清Size，亦要留意用料、顏色與相片或有出入，唔啱着就嘥料啦！另外亦要注意貨幣匯率，好似近日日圓大跌，到日本Online Store購物就最划算；相反人民幣愈升愈有，隨時買貴貨。但最後都奉勸大家，Shopping要量力而為，購物前應三思，千祈唔好做「月光族」呀！

達人教路：Joey Ma

有多年網購經驗嘅時裝達人Joey Ma話尺碼最重要：「我通常淨係會買太陽眼鏡、帽之類嘅產品，因為Size冇咁易出錯。如果女士們想買衫、裙的話，建議買鬆身Cutting，最好去埋H&M、Zara等時裝店度吓尺寸，咁就最穩陣！」另外Joey亦提醒網購風險：「曾經試過賣家寄出嘅貨品爛咗，要郵寄退回公司，最後Refund收場，大家購買時記緊衡量風險呀！」