合金小雲 貓耳Look Take Two

合金玩具出嚟出去都係機械人？非也非也，曾幾何時《多啦A夢》、《Q太郎》、《IQ博士》都出過「POPY合金」，當中以則卷小雲最得寵，既有原著工人褲套裝，仲出埋貓耳Look等經典造型。事隔多年，港產Action Toys亦秉承先例，繼去年EX合金小雲後，今期再下一城加推貓耳Version，沿用之前作嘅可動素體，造型就換成藍色貓耳連尾巴套裝，隨盒跟埋變身槍之餘，又全新雕模嘅小吉，卡娃兒打孖上！

同盒小吉齊換Look

以前嘅小雲玩具，多數用搪膠製造，衣服嘅層次感往往要靠雕功表現，質量參差，EX合金就跟足現時主流嘅1/6 Action Figure做法，喺素體身上再着上白恤衫、藍色煲呔及藍色吊帶褲，以上衣物統統都係織布車工製成，金色鈕扣嘅塗裝亦都唔馬虎，Cap帽又有一對大耳仔，背後又有長尾巴，講質素，拍得住價錢貴一大截嘅日廠Medicom出品，至於隨盒跟埋嘅小吉係新模雕刻製成，與小雲齊齊換成貓耳Look，表情就由前作嘅「啫嘴」變成咧嘴而笑，夠過癮！配件方面，前作嘅米田共唔見咗，取而代之係變身槍，塗裝準確，絕冇髹出界。

金屬下盤企得穩

可動性方面，小雲沿用前作素體，受力關節及腳板都係Die-cast製成，故此即使小雲頭大身細都企得穩，加上手腕及膝蓋呢類經常扭動嘅關節，就加入鐵線連接，玩得多都唔易鬆。表情組件亦沿用磁石連結方式，先除眼鏡、再拆開前額嘅齊蔭頭髮，就即任換笑口Look或者啫嘴樣；由於換件方法跟前作一樣，如果粉絲已經買咗前作嘅話，就可以同今次嘅貓耳Version互換面相組件，變出更多嘅趣怪表情。

©AKIRA TORIYAMA/SHUEISHA, TOEI ANIMATION　查詢：2390 9843（Action Toys Ⅱ）