慈善農莊盛宴

自問不是環保狂熱分子，但仍想為地球出一分力。尤其欣賞本地農夫的默默耕耘，同時支持不少餐廳選用本土生產的蔬菜入饌，最近就知道Homegrown Foods將在4月20日舉行第3屆慈善豐收盛宴，實質是音樂表演加名廚Buffet攤位的農莊之旅，入場券每位$1,488，12歲以下小童$888，收益撥捐慈善機構The Hummingfish Foundation及Homegrown Foods學院。之前曾幫襯他們，所出品的蔬菜真的非常新鮮，味道還特別鮮甜，賣菜不忘做善事，我Buy！

Silvia Reporter

富豪拉麵

多得朋友請客，有幸到位於銅鑼灣、前身為米芝蓮一星創作麵工房MIST的拉麵鐵人豪歎拉麵。店子繼續走Fine Dining路線，並只接受訂位服務，當日邊吃邊欣賞開放式廚房內大廚的手藝，氣氛真不錯。我不客氣柯打了全店最貴、價值$380一碗的牛肉清湯配鹿兒島A5級和牛拉麵，湯底如法式燉牛肉湯般純淨清澈，香味濃郁。最後滴上數滴法國鵝肝油，為烤得外脆內嫩的和牛添上脂香。不過，連埋加一服務費要四百幾蚊一碗，是否抵食真係見仁見智。

Doris Reporter

估佢唔到新味

周日素來是Leung's Family Day，例牌一家大小飲茶，早前細佬提議試吓荃灣新張的新斗記。食食吓來了一道 「炸生蠔」 ，賣相幾吸引，筷子還在半空，姐夫突然大叫：嘩！一定係有古怪。於是第一時間放低雙筷問個究竟，原來這是炸茄子，仲要未熟透。原來是家中小鬼想嘗新口味，點了這道貌似炸生蠔的茄子，所以話，有時都係保守啲好，食蝦餃燒賣穩陣啲！

Belinda Reporter

加料溫泉蛋

做記者經常捱夜寫稿，要集中精神，食嘢係一個好方法。長夜漫漫，煮個即食麵雖然已經係好享受，但若想加料就有啲麻煩，不過自從在7-11發現呢款即食溫泉玉子後，情況就唔同晒。不用煮不用計時間，打開隻隻都係流心蛋黃，用來撈飯或麵都咁一流。

Ampo Reporter

能量牛腩米線

作為食版新丁，早前跟同事去做採訪，午飯時她帶我到油麻地的穆姑娘成都名小吃醫肚，點了一碗川香牛腩米線，湯底清甜略帶麻辣卻不嗆喉，客人可自選大中小辣度。吃一口米線，滑而煙韌，主角牛腩則腍而入味不黏牙，同事又點了幾客小吃，都是充滿驚喜之作。這頓豐富又飽肚的午餐，為我注滿能量，再次努力工作去。

Cherry Reporter