限定遊戲版乳酪

在下都幾Like食乳酪，當見到呢款遊戲限定版乳酪當然要試下。呢款話係新Game《Gears of War：Judgment》嘅特別版乳酪，係遊戲廠同Tuttimelon合作嘅Crossover，特別在係新口味喎，Oreo味原來代表遊戲入面嘅暗黑魔族，士多啤梨味就係人類滿腔熱血咁解，是但揀一種都會另外送多塊印有遊戲Logo的朱古力塊添！不過我就貪心啲，要咗隻兩溝口味，都幾好味，唔會太甜。呢隻特別版乳酪限時推出至4月18日，如果帶埋張購買呢款遊戲嘅正本收據仲會平$5，抵！

Brian Reporter

Macross無雙

筆者月頭出糧扣除一切固定開支及儲錢後已所剩無幾，但仍不減買心頭好的雅興。之前PS3連番推出大作，愛日系遊戲的小記特別鍾情《真˙三國無雙7》以及《Macross 30》。其中《無雙7》追加了三代時的「if」假想劇情，可體驗跟歷史不同的故事；至於《Macross 30》屬全新作兼有RPG成分，而戰機的操作性也相當流暢，兩隻Game都係誠意之作，故此一口氣畀$1,200入齊晒兩隻，荷包即時乾塘！相信本月餘下時間要捱麵包喇！

Alfred Reporter

值博Wi-Fi卡

Wi-Fi當道，但唔係部部相機都「十卜」，惟有靠Wi-Fi卡先可以無線傳相。市面上有林林總總Wi-Fi卡，小記最終都買咗呢張Eye-Fi卡。縱使佢嘅定價比同類產品貴，8GB要成六舊幾水，不過用起上嚟夠穩定，傳輸速度唔算慢，最緊要係自動連線嘅速度夠快，斷線後唔使手動Set來Set去，貴少少其實都值得。唯一挑剔地方係前期嘅設定較為繁複，要用電腦激活先得，唔好諗住可以即開即用呀！

Jason Reporter

愈搞愈大抽

小編喜歡將成串鎖匙鈎喺腰間，早前買咗個Niteize出品嘅黃色「S」扣嚟穿鎖匙，轉頭發現同廠有個一大串由六個迷你「S」扣組成嘅鎖匙扣更正，咁就買啦！後來又見到山系潮牌Wild Things有個螢光粉紅款型到不得了，結果買埋。咁之前買嗰兩個扣咪好嘥？係囉！所以我就將佢哋統統串埋一大抽，再鈎埋把迷你萬用指甲鉗落去，猶如凌凌漆個Friend發明嘅「攞你命3000」，我問你怕未？

Tony Reporter

自讀都要寫日記？

小記不是少年，經常自讀，但不寫日記。雖然不再年輕，不過睇這套《少年自讀日記》仍相當投入。電影由原著小書作者Stephen Chbosky親自改編及執導，描寫文藝少年查理性格孤僻，直至遇上狂放的師姐及師兄，生命才開始改變。電影探討了校園欺凌、吸毒、精神病及同性戀問題，但卻不流於說教，帶出年輕人總有無限可能性的主題。可能因為電影處處流露出年少輕狂，中文戲名亦改了「自讀」一個如此語帶相關的字眼，與小記近期最想睇的《挪威的呻吟》（Turn Me On, Dammit），堪稱近年兩套最唔關事，但又最引人遐想的戲名。

Angus Reporter