《BioShock Infinite》反轉天空之城
2011年E3首度亮相就擸咗唔少評論獎項嘅《BioShock Infinite》，延期差唔多半年之後，終於本月底正式推出。以射擊遊戲而言，前兩集《BioShock》風格另類得嚟又好中玩家心理，結果當然大受歡迎，到今集就更加落足本錢，將遊戲舞台由海底轉到天空之城，一手武器一手超能力之外，仲玩埋高速空中激戰，連華盛頓機械人都出嚟打埋一份，Fans等足半年睇嚟都值得！
俄美女Coser做女主角
《BioShock Infinite》時間背景設定喺1912年，即係一個世紀之前，但場景就由之前的水底玩到去天空之城哥倫比亞，至於主角Booker嘅任務係要坐支土炮火箭飛上去哥倫比亞。Booker係一位前探員，受人所託去天空之城搵一個一出世就被囚禁的少女Elizabeth，橋段雖然都幾熟口熟面，不過演繹方法就有佢嘅特點。Elizabeth既係Booker保護嘅對象，亦會同Booker發展出非常具張力的關係，激發起Booker嘅超能力，然後一齊冒險脫險。有啲遊戲會以名人明星作為角色設計藍本，《BioShock Infinite》都係，原來樣貌娟好嘅女角Elizabeth係以俄國著名Coser Anna Ormeli Moleva嚟做藍本，唔識佢唔緊要，總之夠索就得！
出天鈎滑行擊殺
本作之前搞咗個傳媒試玩會，可以搭船去到接駁天空之城哥倫比亞的燈塔，靠解謎搭乘土炮火箭衝上哥倫比亞，然後要在城內尋找Elizabeth。雖然未算得上好頂尖，但遊戲畫面的處理以至速度感都好有水準，尤其之後Booker學識使用天鈎，可以勾住扣環高速滑行，速度感強。除可用天鈎迅速轉移地點外，向下俯衝時更可對地面敵人作致命一擊，真係連好多頂級動作遊戲都做唔到呀！
華盛頓機械人出擊
Booker要賺錢在自動販賣機上購買補充體力與精神力計量表的回復藥外，亦可以在關卡入面獲得各種強化能力的裝備，亦有用嚟提升護盾、體力與超能力計量表上限的強化藥劑，愈打就只有愈強。當然《BioShock》系列最強都係超能力，Booker喺戰鬥途中會學得各種超能力，例如可以Hack入裝置將敵對機械變盟友，或者召喚烏鴉殺人，連雙手出埋火球都得，天馬行空，無所不能，可見呢個系列點解咁受歡迎，其實有迹可尋。反派角色設定都好有心思，好似其中一大魔頭「機動愛國者」原來係美國總統華盛頓造型的機械人，當佢受重創後更會露出原來面目—金屬骷髏頭真身，玩到咁激，Fans自然鍾意同投入。
INFO
類型：射擊
開發：Irrational Games/2K Games
平台：PS3、Xbox 360、PC
推出日期：3月26日
售價：$428（普通版）$599（特典版）
查詢：2528 0830
華盛頓機械人火力好猛o架，玩家要提防提防。
使用天鈎就可從天而降，滑行擊殺。
場景設計都流露20世紀初美國城市的風情。
女主角Elizabeth就係以俄羅斯美女Coser Anna Ormeli Moleva做藍本。
Elizabeth既要保護目標，亦係主角嘅好幫手。
雙手着晒火唔係燒親，而係準備使出Devil's Kiss火球超能力。
一手開槍，一手出火球，點到你唔服！
因為遊戲係以第一身進行，基本上都無乜機會見到主角Booker嘅靚仔樣。
之前喺水底世界，今集轉移陣地去到光明遼闊的天空之城哥倫比亞。
遊戲初段一上到哥倫比亞，要先入教堂受洗先可以繼續。