《Soul Sacrifice》人生交叉點

喺生死存亡危急之秋，你會揀犧牲自己成全團隊，抑或犧牲同伴自己咬緊牙關戰鬥？以為呢個人生抉擇好遙遠唔關自己事？其實呢個係新PSV遊戲《Soul Sacrifice》最特別嘅元素，亦係跟同樣四人連線打怪嘅「芒亨」最唔同嘅地方！玩法方面，要拎唔同武器喪劈，仲可以使出各種魔法攻擊和療傷，絕對係今期趁PS Vita主機落價，出機必買嘅大作！

《Soul Sacrifice》都係由名遊戲製作人稻船敬二領軍製作，加上又係用手提機平台的四人組隊打怪遊戲，難免會畀人將佢同《Monster Hunter》相比。初時睇兩套遊戲都幾似，但玩落其實兩者嘅分別都唔少。

調子黑暗似歐美遊戲

《Soul Sacrifice》遊戲背景係由一本魔法書引起，講被當成活祭品的奴隸喺魔法世界入面反抗，所以成個世界調子都比較黑暗，而且除擸武器打怪之外，仲可以用上「供物魔法」同「代償魔法」來攻擊及療傷，感覺上都幾有歐美魔法遊戲嘅感覺。

為打怪要犧牲同伴

遊戲最有趣嘅係加入「救贖」同「犧牲」選擇，無論係打到怪物瀕死，又或者同伴被襲快將死亡之際，玩家都會進入人生交叉點，手操生死的權柄。以應付怪物為例，救贖佢哋的話就會提升魔法能力，犧牲佢就會提升生命力；而且隨住怪物等級愈高，回復數值就愈多，要怪物生或死就視乎大家想要增加邊種能力。不過最難落得手都係同伴，四位隊員一齊上場，唔救佢又好似唔多夠道義，但在遊戲設定下，救助同伴只能些微提升自己的體力，遠遠不及犧牲同伴般可以大幅提升團隊的生命力、防禦力、魔法力同攻擊力。

夏天將出中英文合版

遊戲設計弔詭在於巨大頭目能力超強，四個玩家團團轉圍剿都未必夠打，反而犧牲一個或兩個同伴而提升餘下角色的戰鬥力，先會較容易去完成任務，到底幾多玩家真係會「犧牲小我完成大我」呢？玩時記得要溝通在先，唔係激嬲咗小器嘅朋友就唔好喇！除咗首先推出的日文版之外，官方宣布《Soul Sacrifice》都會推出中英文合版，預計夏天推出，不過官方就話中英文版同日文版唔可以連線，最好就夾定班朋友一齊買日版或等中英文合版，但係家吓PS Vita主機跌到咁平，都係早玩早享受好啲囉！

INFO

類型：動作

開發：SCE

平台：PS Vita

推出日期：3月7日

售價：$388（日版）

查詢：2341 2356