大光圈外攝利器Olympus Stylus TG-2

雖然有排先到夏天，但係三防機經已蠢蠢欲動，就算依家唔係去沙灘的季節，去行山或者滑雪一樣用得着。Olympus近日就返咗部Stylus TG-2三防相機，仲配備F2.0大光圈鏡頭，咁就可以保持快門速度，影相唔會矇查查。

三防再強化

能夠上山下海的TG-2，紅撞黑用色醒目，外形硬朗夠晒Man，最適合熱愛戶外活動的人士使用。新機的三防能力也有所提升，尤其是防水方面可達至15米水深，就算落雨抑或浮潛影相都冇問題；加上落足料的金屬外殼，能夠抵受2.1米撞擊，就算唔小心跣手跌落地都唔會咁易撞散，夠硬淨；而且相機可在-10℃的低溫環境拍攝，去寒冷地區依然能夠正常操作。最容易入水的電池匣和接駁端子則具備雙重保險鎖，減低因意外打開而入水的機會，內裏還設有防水膠，做到全面保護，防塵防水。

F2.0大光圈

戶外天色瞬息萬變，萬一遇上陰天，環境唔夠光點算？好彩TG-2擁有F2.0大光圈兼四倍變焦鏡頭，還支援ISO 6,400最高感光度，咁就唔驚手震，而且還有1cm的超微距近拍，想近距離攝下動植物生態話咁易。有時候去到低溫的地方，唔少人都會戴番對手套保暖，但係操作相機就冇咁方便，所以TG-2設有輕敲式操控，只要用手指輕拍機身的上下、兩側和屏幕，即可代替上下左右選項及確定操作。

GPS隨時定位

既然TG-2係不折不扣的戶外機，當然唔少得GPS定位系統同電子指南針，幫你隨時隨地記錄座標和方向，潛水時仲可以記低水深。不過講到Olympus相機最好玩都係特效濾鏡，而11種濾鏡中比較特別的是如鏡子般反射影像的反射效果，還有將相片變成一格格的碎片化效果，在其他相機中實屬少有。此外，TG-2可外置防水45米的PT-053潛水殼，又可加建魚眼鏡或遠距鏡，以擴闊和延伸焦距，令TG-2影相不受環境所限。

SPEC

感光元件：1,200萬像素CMOS

等效焦距：25~100mm

光圈：F2.0~4.9

屏幕：3吋61萬像素

感光度：ISO 100~6,400

其他功能：1cm近拍、內置GPS

體積：111.5×66.5×29.1mm

重量：230g

查詢：2376 2150