Kenny老本行珍藏 見證Figure奮鬥史
只要你是Figure粉絲，都不會對Kenny Wong感到陌生，早在1999年，Kenny便與朋友創立鐵人兄弟，推出多款人氣Figure，連日本玩具雜誌都有介紹，其後作出個人發展，推出Molly和潛水銅人系列，熱愛收藏的他透露：「我有唔少收藏品，都係參加玩具展時順便買番嚟嘅會場限量版，大部分已經喺市場絕迹，有錢都買唔番，珍貴之餘，亦都記錄咗當年一班本地Figure創作人嘅奮鬥史。」
本地Figure製作自2000年正式彈起，本土Figure創作人，包括Michael Lau和Eric So等亦如雨後春筍般活躍起來，推出產量少但富創意的作品，Kenny的收藏生涯亦源於此，他回憶說：「我同兩位朋友喺99年仲創立『鐵人兄弟』推出原創Figure，從此成為玩具展常客，展出自己作品之餘，亦會觀摩其他本地同行創作，好似ThreeZero嘅作品充滿街頭板仔風格；Hot Toys與Eric So合作的傘兵，每個金屬扣及通話線都製作仔細。每個創作單位都表現出自我創意及風格，比起現時強調手工、但商業味重嘅Figure，我覺得當年嘅作品更加有收藏價值。」
惺惺相惜 忍不了手
因此，Kenny有不少收藏品都是當年的會場限量版，大部分已不再公開發售，Kenny表示：「加上我自己都係Figiure創作人，見到一啲製作水準高又有誠意嘅作品，當然想支持一下，好似創作人阿寶喺2000年推出嘅孫悟空，身上每塊軟甲嘅壓花都做得好仔細，以當年售價及限量關係，我懷疑佢很難收回成本，見到呢啲作品，又點可以唔支持！」
珍惜舊作 觸發共鳴
雖然Figure熱潮在2000年彈起，但當年的製作技術仍屬起步階段，遠不及現時成熟，不過Kenny依然對「那些年」情有獨鍾，他認為：「講到Figure製作技術，現時當然係Hot Toys等大廠最頂級，睇到近期嘅蝙蝠俠、貓女等作品，絕對係世界級。不過睇番當年嘅作品，又有另一種味道，可以從中反映本地Figure嘅發展史，了解到Figure製作技術慢慢成熟，面相雕刻愈來愈神似、配件愈來愈仔細齊全，留心嘅話仲會發現創作人為咗控制成本，因而絞盡腦汁研發嘅新技術等，作為同一時期一齊奮鬥嘅Figure創作人，我絕對感受到那種共鳴感。」
Kenny
珍藏解畫：孫悟空
「身上每塊軟甲都有仔細壓花，而且面相雕刻細膩，又有三款表情嘅頭雕，加埋唔同形狀嘅手掌，以及製作精美嘅金剛棒，絕對是誠意之作。」
Monkey Play Ground
「由本地創作單位ThreeZero與Jason Sui合作炮製，將街頭板仔元素融入其中，頭頂嘅大型唱機就係最大標記，喇叭面仲有一層格仔網，幾可亂真。」
李小龍
「由Eric So與Medicom Toy嘅合製，面相、服飾都好講究，總共推出咗12款，我就有兩款，除咗水準高，我仲好鍾意嗰種G.I.Joe Figure嘅風格。」
Snowpea
「Ashley Wood係澳洲嘅著名插畫師，Snowpea就係佢同本地單位ThreeA合作炮製，將Ashley Wood獨有嘅暗黑畫風，成功立體化重現喺Figure身上。」
雪地特別任務連
「作為獨立創作單位嘅兵13，專門出士兵Figure，呢款雪地兵就係當年玩具展嘅會場特別版，雖然用現成Body，但係服飾、武器及配件都極之細緻。」
ToyStory綠兵
「同樣係HOW2WORK作品，製作難度相當高，既要造型神似，又要用一層軟膠包住Figure Body，藉此保持身體唔會變形，又兼顧到關節靈活性。」
向左走、向右走
「現時製作Figure有3D資料支援，當年HOW2WORK只係靠平面圖，已經做到神似度高嘅面相，呢款幾米原著嘅《向左走、向右走》Figure就係好例子。」
潛水銅人
「繼鐵人兄弟之後，首個個人炮製嘅Figure系列，一共出咗六款，除咗注重雕功，潛水頭盔可以套落Figure個頭之餘，而且用金屬製造，夠晒分量。」
Kenny品評Figure，除了留意手工質素，更加重視Figure的整體平衡感，後者是表現角色神髓的關鍵。