《iMadeFace》自製卡通臉

有冇見到近期唔少藝人、明星都紛紛喺Facebook或Instagram貼上自己個卡通樣呢？原來大家齊齊熱玩《iMadeFace》呢隻App。玩法好簡單，只要揀好性別之後，就可以依據面型、髮型、五官等特徵DIY卡通版樣貌，神唔神似就睇你功力喇！若嫌原生嘅人面特徵太普通，仲可以進入「潮店」買價值$8嘅禮包，咁就有唔同嘅造型畀你揀，好似青蛙帽、聖誕老人等等，夠晒搞鬼！

系統︰iOS 6.0以上

下載費用︰免費

《Stick to It !》刺蝟怪考物理

遊戲係要協助好似刺蝟嘅怪物Spike返到阿媽身邊，玩起嚟似《Angry Birds》之類嘅物理遊戲。每一關Spike同阿媽都會分別喺畫面唔同嘅方向，一開始Spike就會向下墜，玩家就要控制佢走位同落點；好玩在Spike身上有刺，一篤芒就會彈出兼拮實四周物件，而出刺、收刺嘅次數仲有限制，都有難度o架！遊戲有成80關，用來消磨時間都唔錯。

系統︰iOS 5.1以上

下載費用︰免費

《SlotZ Racer 2 HD》極速軌道

相信唔少男士細個都有玩過四驅車之類嘅有軌道車仔，遊戲《SlotZ Racer 2 HD》就可以畀你重溫兒時玩意。同一般賽車遊戲一樣，當然都係鬥快完成比賽，不過此遊戲唔係考你入彎技巧，皆因App嘅操控好簡單，篤芒就加速，鬆手就減速，連左右都唔使；不過咪以為狂加速就得，因為轉彎時太快就會飛出跑道，所以加速、減速嘅反應同節奏就係關鍵，唔容易o架！

系統︰iOS 5.1以上

下載費用︰免費

《Take My Machete》懷舊街機風

近年咩都玩Vintage風，就連電子遊戲都唔例外。《Take My Machete》屬橫向格鬥遊戲，特意用上舊式街機嘅8-Bit畫風，粗糙畫面夠晒懷舊！玩家要控制主角揮動大刀或者射箭攻擊外星敵人、飛碟，仲有簡單道具幫你過關，玩法超簡單。雖然場景唔多，不過遊戲都有故事及Endless兩個模式，其中後者最好玩，外星怪物會喺畫面不斷出現，冇得抖打到斷血為止，刺激。

系統︰iOS 5.1以上

下載費用︰免費

《Mailbox》簡易電郵

雖然iPhone原生已經有電郵App，就連Gmail亦有推出獨立App，不過依然唔夠《Mailbox》好用。新App以操作簡單為賣點，向右半掃就可以保留電郵、向右全掃就可以即時Delete、向左掃就會延遲通知，幾個Step就可以處理大量未讀郵件，方便！最可惜是暫時只支援Gmail帳戶，而且App可能登記用戶太多，需要登記後再等一段相當長的時間先用到，快啲改善埋就最好喇！

系統︰iOS 6.0以上

下載費用︰免費

《Ghostbusters》捉鬼敢死隊

經典電影《捉鬼敢死隊》變身做iPhone遊戲，玩家就同電影一樣，控制捉鬼敢死隊各隊員利用一系列高科技捉鬼工具捉妖，再收集怪物作研究。遊戲採用卡通風格，背景音樂亦都夠輕鬆盞鬼，用手指一Drag就可以控制攻擊方向，極度易玩！要留意係所有道具、裝備都可以升級，更可以聘請攻防能力都高啲嘅新隊員，遇着Boss級鬼就幫到手喇！

系統︰iOS 4.3以上

下載費用︰免費