《Crysis 3》強戰紐約超真實

「我張Display Card玩唔玩到呢？」相信呢個係唔少想玩《Crysis 3》嘅PC玩家所關心嘅問題。前兩集《Crysis》可以話係PC Game界的指標，而今集所營造嘅紐約叢林之極細微光源及煙霧變化，更係目前Game界的最高水準，無張勁顯示卡就頭痕！不過，無勁PC或者無高效能顯示卡都唔怕，家用平台版《Crysis 3》一啲都唔失禮，新「獵人」多人模式更非常刺激！

《Crysis 3》嘅PC版對硬件有幾高要求？今集就支援對應DirectX 11的顯示卡，舊少少嘅顯示卡都唔掂，就算用上「卡王」GeForce GTX 680或者Radeon HD 7970都唔會有誇張嘅圖像表現，只係勉強夠用，可想而知呢隻射擊遊戲王牌有幾「大食」！正因如此，PC版畫面表現會較家用版更靚更細緻；不過要揀PC版抑或家用版，就好視乎個人嘅選擇。無論玩邊個平台都好，當玩家睇見遊戲入面利用新CryEngine 3所描繪擁有七大奇觀嘅都市叢林紐約，就會覺得一切都係值得嘅，尤其係建築物入面嘅細節，都睇得出比前作精細，光源表現亦更真實，場面設計也好有電影感！

紐約叢林七大奇觀

今集故事背景設定在2047年，即第二集之後的20年。先知（Prophet）因為發現C.E.L.L.企業所建造的納米裝置暗藏邪惡動機，所以要重返被封鎖的紐約市執行復仇任務。正如前文所講，紐約市已經變成一個叢林，在高樓大廈跟叢林結合下，景觀相當獨特，而且市內更有被稱為「七大奇觀」（7 Wonders）、即七個風格好唔同又相當危險的區域，要生存既要用腦，又要靠先進裝備甚至是外星科技。今集先知除了可以穿着進化版的納米套裝，以及看似原始但功能強勁的新武器「致命複合弓」（Compound Bow），雖然每次只能射出一箭，但射程甚遠，而且可構成嚴重傷害！

新獵人模式等援兵

射擊遊戲最吸引人的係多人模式，《Crysis 3》未正式推出前就已有Beta版，畀玩家率先體驗多人玩法。「墜落點」（Crash Site）就係原有兩隊人馬在地圖上互相廝殺搶分的傳統模式，但對比之下新加入的「獵人」（Hunter）模式就有趣啲。喺「獵人」模式入面，玩家可以扮獵人獵殺C.E.L.L.士兵，而扮C.E.L.L.士兵嘅玩家火力就唔夠揪，要捱一段時間等救兵，呢種強弱懸殊嘅多人玩法依家都幾常見。呢個「事前」Beta版只有博物館同機場兩張地圖，而實際遊戲就收錄咗12幅地圖，更有八款不同多人模式，家用版支援到12人連線對戰，PC版則厲害到可支援16人連線！

INFO

類型：射擊　

開發：Crytek Studios　

平台：PS3、Xbox 360、PC　

推出日期：今天　

售價：$449（PS3、Xbox 360）、$389（PC）

查詢：3166 6001