歎日本土產杯麵

去到杯麵發源地日本，唔買番個杯麵做手信就對唔住自己，因為嗰度口味選擇多過香港好多，而且部分只限日本內銷，香港未必有得賣。要帶晒咁多種口味返香港，既不可行，亦不可能，結果只買了一杯鮮奶海鮮味。一試之下發現日本出產的杯麵果然好食啲，材料足唔在講，湯底飲唔出有味精，奶味仲好濃添！約售¥160，其實唔算貴，事關喺日本是但搵間拉麵店食個麵，都要付出貴五倍的價錢。

Jason Reporter

恒溫褸影星良伴

小記有個朋友一年三百六十五日都着住件風褸，被人戲謔：「你件褸恒溫o架？」大家孤陋寡聞喇，呢個世界真係有恒溫褸！小記不時上山影星，天寒地凍，有次仲接近零度添呀！後來上網見有人讚呢件Milwaukee恒溫褸夠掂，佢內置電熱線，保證暖笠笠，賣千五蚊，於是即刻買番件。試着過一次，真係名不虛傳，雖然小記都仲要戴冷帽同手套頸巾先頂得住，但至低限度個身夠暖先，以後冬天影星真係要靠佢。

Michael Reporter

其實我係買個樽

我係會為咗個靚包裝而買產品的人，尤其入到便利店有過百種飲品，唔睇包裝試問點揀先！上次去台灣出差，入便利店諗住買罐咖啡夜晚打稿時飲，突然發現有款設計簡約、色調火紅的圓膠樽「可可摩卡」咖啡，二話不說就拎去畀錢，加埋支藍樽「重焙曼特寧」打孖上，就算唔好飲，齋儲個樽都抵。飲落其實都唔差，每支都係盛惠八個幾港紙，抵飲，不過提唔到神，飲完仲竟然好瞓咗！上網一Check，原來討論區上好多港男、港女都討論緊呢個品牌嘅咖啡同奶茶，各位下次去台灣，大可試試啱唔啱自己口味！

Brian Reporter

美牌抵玩爬山Boots

其實小記一直都好Buy山系打扮，不過喺本篇樓下嗰位編輯Tony新入手嘅Diemme我就嫌貴！早排就有同事報料，話美國品牌Merrell嘅Wilderness行山靴喺某百貨公司做緊半價，唔使$900就買到；需知道呢款Boots近年日本勁Hits，唔單止雜誌狂煲，o架仔仲喪着，而且鞋身全皮，仲有Vibram鞋底，買嚟玩番一季半季都夠晒抵啦！

Vincent Reporter

瑞典遙遠Shopping

筆者並非「時裝精」，但肯定係「購物狂」，至愛搵平靚正嘢。實不相瞞，香港地Shopping愈來愈唔吸引，例如波鞋街，十幾廿年前的確好多過癮款式，依家店舖倒模，出售貨品亦係倒模，而有些產品售價更是離晒大譜地貴，原因我估大家都明。近年，筆者愛上網上購物，各大網站不時有折扣，計埋運費千里迢迢送到屋企門口都仲平過香港買。圖中呢堆產品就係喺某瑞典服裝網站大搞半價優惠時訂購，一星期內就速遞抵港，而重點產品係意大利製的Diemme山系Roccia Vet藍鞋，唔計運費，只係約千三大元而已！呢個價錢，恐怕喺香港只能夠買得右腳乙隻。

Tony Reporter