賞生態遊古蹟 悠閒兩個轆

近期天氣晴朗，不少人會搞次單車遊，不過來來去去都是大圍踩入大埔，最多入埋大美督BBQ，你唔悶，身邊朋友都厭啦！所以今次小記搵來單車達人宋兆暉（阿暉）幫幫手，Plan個易踩又有趣的行程，先喺天水圍濕地公園出發，再睇屏山文物徑嘅百年古蹟，尾站再去南生圍欣賞候鳥生態，慢轆夠寫意，悠悠閒閒過番日！

未出發先搵路

未搵單車達人宋兆暉之前，小記已經上網做足功課，發現原來不少單車友都會玩單車遊，隨便一Search就搵到幾十條路線，於是膽粗粗獨行出車遊流浮山，點知踩到筋疲力盡，最後竟然要中途放棄搭的士回程。有7年踩單車經驗、雲鵬單車嘅阿暉就提醒：「出發前一定要用Google Map檢查路線，沿路有冇單車徑、又會唔會出現崎嶇路段呢？其次就係路線旁邊的商店位置，萬一環境太荒蕪，補給品好似水袋就唔少得。最重要是評估自己的能力，亦要作體力不支的打算，要先了解路線中途的回程點。當然仲有最老套嘅要點，好似兩人同行、帶備指南針啦！」

揀車要留神

經過阿暉教路，小記第一步就開始擬定行程，今次路線由天水圍出發，先去濕地公園，再到屏山文物徑，然後經青山公路向元朗單車徑，途經朗屏鐵路站，進入元朗範圍，之後就到南生圍，最尾以元朗作終點。「這條路線歷時約4小時，沿路都有不少單車徑，而且平坦唔多斜路，算係比較易踩。」本身小記諗住帶備私伙小輪徑出發，殊不知阿暉立即喊停，原來係一對幼胎出事：「其實單車遊大多以低速、慢踩為主，Mountain Bike和小輪徑的單車款都冇問題，前者車身有前避震，遇着小凹凸地方就踩得更舒服；而後者則輕鬆慳力，小朋友、女仔一樣啱踩。反而以高速見稱嘅Road Bike踩嘅時候好嘥力，唔適合進行單車遊。」他再補充：「唔少用家為咗外形更靚、速度更高而改用幼胎，若然踏中坑渠，胎身隨時會被攝住，容易發生意外！」

屏山古蹟超悠久

記住喺單車身上安裝頭尾燈，最後戴埋頭盔就萬事俱備，出發！我哋一行幾人中午時分由天水圍出發，同不少新市鎮一樣，整個天水圍區都由單車徑包圍，沿天慈路進入濕地公園路直踩就可以到達濕地公園；雖然大家不可以踩單車入公園，不過門外就有免費單車泊位，鎖好架車就可以入去，喺室內舒舒服服睇生態展館又得，出去戶外生態濕地觀鳥亦得，各適其適。遊完濕地公園，就可以沿排水道旁嘅單車徑去番天水圍西鐵站，站後不遠處就係第二站嘅屏山文物徑，1993年開幕的屏山文物徑，就係位於坑頭村、坑尾村以及上璋圍一帶的古建築物，據講新界五大家族之一嘅鄧氏早於12世紀定居此區，建築物就陸續興建而成，歷史悠久。大家先會見到六角形三層高、有600年歷史的聚星樓，設計獨特好易認，然後沿小路踩就會見到超過700年歷史的鄧氏宗祠、1870年建成的覲廷書室及由1899年建成、舊屏山警署改建而成嘅屏山鄧族文物館，總共有十幾座古蹟。阿暉叮囑大家：「屏山文物徑這段路較窄，千祈唔好逐個橫排踩，免生意外！」

南生圍睇生態

睇完屏山文物之後，沿屏廈路離開天水圍區，經青山公路向元朗單車徑到達元朗，整個路段都有單車徑覆蓋，只要保持左線行走，不要越過對面線基本上都好安全。進入南生圍路之後，旁邊就是山貝河及錦田河，留意會有不少白鷺及候鳥在此聚集、覓食，場面壯觀，有長炮相機喺身仲可以「打雀」添！沿河邊繼續前行，約15分鐘的路程就會入到電影、MV取景聖地嘅南生圍，大片草原、小橋加上魚塘，濃厚的大自然氣息、遊人嘅步伐都特別放慢，隨時令人錯覺身處外國，放低架車抖下就最好不過。整條路雖然冇劃為單車徑，不過路面平坦又是直路，相當好踩，踩到盡頭就會看見渡頭，幾蚊就可以體驗人手划的橫水渡過河，仲可以帶埋部單車上船，超方便！過完河就會返到元朗範圍，亦是終點的所在地。

其他路線推介：流浮山一日遊

唔鍾意玩生態遊，亦可以好似小記咁踩入流浮山。同樣由天水圍出發，由天影路進入深灣道直入流浮山，可以喺度食著名嘅生蠔、睇吓由蠔殼堆成嘅蠔塚之餘，亦可行吓流浮山街市呢條老街。大家仲可以順道往坑口村方向的深灣路踩10分鐘去估計是建於康熙45年的「沙江天后廟」，古廟環境清靜，更有空地遠眺深灣公路大橋，影日落超正！

環遊將軍澳

同天水圍一樣，將軍澳區以單車徑貫穿，而且近來仲開放咗新一段單車徑，可以由寶盈花園後的海濱長廊踩至日出康城，沿路有海風及雙線直路，易踩到極。

裝備逐件睇

揀頭盔都有學問，左邊款式安全性較大，因為連後腦位置都有保護，不過相對較重；而右邊款式則輕身得多，亦比較透氣、舒服，長時間佩戴都唔辛苦。

無論日頭定係夜晚出車，最好安裝頭尾燈。方向尾燈可以讓側面、後面的行人都看到，千祈唔好用單一方向而且不夠光猛的青蛙燈，令旁人難以察覺。而頭燈則可照光地下，畀大家睇清楚前路有冇障礙物之餘，前方車都見得到你。

單車鈴都好重要，緊急起上來有警示作用。

遇上崎嶇路段時有機會爆胎，帶備後備胎、胎匙及泵就更穩陣，不過記住事前喺屋企練習吓換胎程序。

查詢：2476 4545