台灣直擊：美女坦克攻入台北電玩展

台北電玩展向來都比較着重台製PC Online Game以及電競比賽，不過今年就有改變，外國超流行的線上戰爭遊戲《World of Tanks》首度登陸台灣，大灑金錢搞宣傳，既搵來辣妹現場對打，更成架坦克吊入會場吸引人流，並包起全場第二大攤位，成功上位！至於最大參展商Sony亦保持水準，既有多款新遊戲試玩，而且Promotion Girls質素更可謂全場至省鏡！

《World of Tanks》七辣妹表演賽

《World of Tanks》台灣當地譯做《戰車世界》，其實遊戲幾年前已在世界其他地方陸續推出，好似美國就在兩年前，韓國就係去年底，今次屬首度攻台。開發商Wargaming.net一向好落本宣傳，擺架坦克去《World of Tanks》就最直接不過。跟前兩年都在E3展館外面擺放坦克唔同，今次直情就成架FV4202（105）酋長式坦克放入TpGS會場，認真搶鏡！

至於遊戲係以20世紀中期戰爭做主題，供多人線上玩，融合動作、策略、模擬同線上RPG元素，收錄超過150款坦克等戰鬥載具，美國、蘇聯、德國主力坦克都有份登場，支援30位玩家對戰。展覽區方面，除小型試玩台，更設有大型對戰台玩七對七坦克大戰，展期內每日下晝都有七位作軍官裝扮的辣妹同七位「宅男」玩家打場友誼賽！原來幾位辣妹唔止睇得仲幾打得，現場更有成20個軍官辣妹教大家玩添！Wargaming.net仲話，另外兩款戰爭Game《World of Warplanes》（戰機世界）同《World of Warships》（戰艦世界）都預計今年內在台灣上市呢！

《霹靂神州 Online》布袋戲改編

香港對台灣布袋戲未必熟悉，剛在TpGS期間公測的《霹靂神州 Online》就係以劇集《霹靂神州三部曲》作遊戲藍本，玩家喺遊戲入面要扮演正道中人，以打大佬「棄天帝」為主要任務。為咗令遊戲擺脫太過老土嘅形象，角色設計都落過心思，遊戲「人、魔、妖、仙」四族服裝都各有特色，魔族以黑紅兩色為主題，而妖族更係參考韓式風格！

PlayStation 84吋《GT5》美女列陣

今年Xbox無參展，PlayStation係唯一家用平台遊戲參展商，而且規模更係全場最大。主舞台更同香港亞洲遊戲展一樣，安排了遊戲製作人出場介紹新遊戲，站台的知名製作人就有扮春麗扮到上晒癮的小野義德（不過今次係介紹《Vampire Resurrection》）、《Soul Sacrifice》的稻船敬二，以及《Lightning Returns：Final Fantasy XIII》監督鳥山求，鳥山求更喺閉門的媒體訪談中，示範玩中文版《Lightning Returns：FFXIII》部分場景。今集最特別係可幫Lightning換衫，不過鳥山求就話為咗保持形象，髮型就唔轉，不過只能控制Lightning一個人打RPG感覺就有啲奇怪！

至於現場可供試玩的新遊戲，大致同香港亞洲遊戲展時差唔多，好似《Soul Sacrifice》同《One Piece無雙2》都有得玩，亦有得戴住Sony頭戴式顯示器HMZ-T2玩3D遊戲，但今次再加碼用上新推出、售價超過20萬港元的84吋4K BRAVIA電視玩《GT5》。另外，Promotion Girl亦相當養眼，甚至比東京遊戲展更高質素！

《群龍默示錄》養龍攻日歐美

被喻為2013年最矚目台灣線上遊戲《群龍默示錄》，亦趁TpGS公布將會在3月13日公測！呢隻奇幻風格線上遊戲，故事發生在一個人龍共存的世界「奧拉蒂亞」大陸，玩家可以自由接觸同駕乘超過300種不同的龍類，跟其他飛龍遊戲最唔同係今次可以透過「龍巢系統」為龍類「升呢」一齊出戰，種類更有飛龍、巨龍甚至水龍添，牌面已經好吸引！開發公司思維工坊計劃會進軍日本、歐洲同美國，唔知會唔會遲啲喺香港開Server呢？