爆甲爆上癮MG Nu Gundam Ver. Ka

Unicorn Gundam及Banshee嘅「NT-D」爆甲變形噱頭，迷倒唔少高達粉絲，或者有人會尋根究柢，追問點解《馬沙之反擊》之中，Nu Gundam嘅「Psycho Frame」發動效果，只不過係機體周圍發光了事？有見及此，為咗銜接《Gundam UC》嘅爆甲設定，機設大師Katoki重新詮釋Nu Gundam嘅構造，追加Psycho Frame爆甲效果外，又用埋最新開發嘅一體成形手掌設計，加埋專用展示台，Fin Funnel全射唯美重現。

銀底綠扮發光

同舊版嘅MG模型相比，Nu Gundam Ver. Ka嘅最大賣點就係加入Psycho Frame設計，關鍵之一係內構追加大量條紋狀嘅透明綠組件，背後貼埋銀色貼紙，就可模擬出發光效果，配合頭頸部分預留空間加裝LED，令雙眼及額頭感測器可以真正發光。關鍵之二係爆甲處理比Unicorn Gundam簡單，純粹趟開肩甲外側，以及胸部、腰部、雙手及雙腳嘅裝甲，就會露出綠色部分，同時拆走下腹、後踭及背包嘅多餘裝甲，最後將推進器拉開就成事。正因玩法簡單咗，精密度亦比唔上Unicorn Gundam，令筆者有捉到鹿唔識脫角嘅感覺。

預設全武裝Parts

除咗Psycho Frame，Ver. Ka喺細節上的確比舊版MG進步得多，而且分色仔細，基本滲線加埋消光處理後，已經有好高完成度，唯一敗筆係胸部嘅黃色散熱槽冇用到分件構造，與全身嘅精密設計相比，有啲格格不入。配件方面，背包另設Double Fin Funnel裝備，只要換走右側嘅滾筒軍刀架，就可以背包左右都帶到Fin Funnel。如果你已經另外訂購咗Fin Funnel組件，就可實現動畫中都未出現過嘅12門Fin Funnel全裝備形態，重火力形象相當霸道。

查詢：2433 1828（瑞華行）