大食懶為食物而戰《加菲貓總動員2》

經典人氣卡通人物加菲貓出名大食懶，之前一集《加菲貓總動員》為了守護食物，已成功痛擊外星人入侵，而全新一集《加菲貓總動員2》，講外星人打算報復，企圖搶奪地球上的食物，加菲貓再次為了守護食物而肩負重任。玩家需要選擇加菲貓、阿的或者毛毛，率領鴨子偉德、綿羊蘭莉等一眾角色抗敵，並在紐約、巴黎等多個主要城市開戰。遊戲融合了動作、塔防和戰略元素，把漫畫的視覺風格呈現眼前，加上遊戲設有對戰模式，讓你在PVP競技場與朋友爭奪Pizza，加菲貓粉絲又點可以錯過！

支援平台：Android 2.0.1以上、iOS 4.3以上

下載費用：免費

泊車指南《泊車易》

經常都聽身邊的駕車人士埋怨，香港地養車難，泊車更難。的而且確，香港住人的地方已經不多，更何況泊車！唔想搵車位時盲摸摸四圍兜，《泊車易》工具程式或者可以幫到你，內裏搜羅了全港九新界各大小停車場資料和價格，仲有各車場時租、日租、夜租、全日泊及月租價格資訊，甚至連泊車優惠、商場優惠都一應俱全。當然最重要的詳細地址、付款方法等資訊都有齊，如果唔識揸去都唔緊要，程式內有Google Map地圖指示大家，邊度有停車場一目了然，既省時又快捷。

支援平台：Android 3.0以上、iOS 4.0以上

下載費用：免費

跳跳超音鼠《Sonic Jump》

唔知大家有無玩過《超音鼠》，當年Game Gear年代係以橫向的遊戲方式過關，而今次介紹的《Sonic Jump》依然係由超音鼠做主角，但係玩法就有少少唔同，不再是橫向遊戲，而是需要不斷垂直跳躍，穿越太空，最後粉碎壞人的陰謀。遊戲的玩法好簡單，玩家只需要搖晃手機和觸控屏幕，操作超音鼠向更高的目標前進，沿路當然會受到敵人攻擊和阻礙，獲得金環可購買道具和Wallpaper。遊戲主要分為故事模式和街機模式，前者以過關為目標，而後者則以挑戰積分為主，整體而言玩得爽快。

支援平台：因裝置而異（Android）、iOS 4.3以上

下載費用：$15.42（Android）$8（iOS）

越礦飛車《Rail Rush》

好多時以冒險為題材的電影，都會有一幕坐礦場車的驚險場面，睇落都特別刺激，如果大家想體驗坐下礦場車的衝刺感，咁就要一試《Rail Rush》。這個遊戲類似早前大熱的《Temple Run》，大家將扮演一位探險家，乘坐礦場車穿越礦場，沿途不時會有陷阱和金粒出現，呢個時候大家需要搖擺裝置或滑動屏幕，以避過陷阱和獲取金粒，仲有鑽石等住你拎，而金粒和鑽石的作用可以購買道具協助通關。遊戲將有四個不同角色、六個場景等你挑戰，成為新一代奪寶奇兵。

支援平台：Android 2.1以上、iOS 4.3以上

下載費用：免費（Android）$8（iOS）

搵錯處《找不同大戰2》

假如你自問係完美主義者，對每事都諸多挑剔，任何錯處都逃唔過你的法眼，咁就一定要玩專門找錯處的《找不同大戰2》。相信唔少人去機舖都有玩過Photo Hunt，而《找不同大戰2》的玩法幾乎一樣，要求玩家在限時內，找出兩張圖片的五個錯處，仲有超過100張圖片等你挑戰，作為Kill Time遊戲相當不錯。遊戲更設有傳統模式和對戰模式，唔單止可以同朋友比併，更能夠合作搵錯處，加上精美的圖片和音效，無論是大人細路都啱玩。

支援平台：Android 2.2以上、iOS 4.3以上

下載費用：免費

海上對壘《BattleFriends at Sea》

如果你鍾意玩策略性遊戲，《BattleFriends at Sea》絕對係你杯茶，因為它是一隻融合了社交元素的策略性海戰遊戲，你還可以邀請Facebook上的朋友或隨機搵一位朋友，在海上決一勝負。遊戲的玩法唔複雜，只要把戰艦安放在海域內，並通過發射飛彈去預測對手的戰艦位置，最終目標當然是擊沉敵方戰艦，擁有相當經驗的老手，能夠輕易預測對手的下一步。遊戲採用了先進的3D圖形的電影特寫鏡頭，對戰的效果相當震撼，仲等？快快叫齊朋友開戰啦！

支援平台：Android 2.2以上、iOS 4.3以上

下載費用：免費