經典獅子頭

三十幾年前，筆者小時候，在香港街道行走的貨車，多是相中這款俗稱「利蘭獅子頭」的英國製Leyland FG。我很喜歡它，因為「樣子」傻頭傻腦，實在太可愛了！據說現在香港只剩一輛，屬私人珍藏，久不久才駛出街威水一番。想緬懷「獅子頭」，惟有買玩具吧！年多前小編買了綠色「昌記」的「獅子頭」，之後就買埋白色運石油氣那輛，比例均是1/76，手工不錯。上星期，小編忍不住又買了兩輛紅色「獅子頭」，分別只在於公司名稱和貨斗而已，明顯是呃錢，不過只售六、七十元，我甘心上當吧！

Tony Editor

輕裝「拍」檔

小記做得呢行，好多時要影相，有部單反傍身都好正常，不過要拎出街往往係煩惱嘅根源，之前唔捨得畀錢買個相機袋，就試過跌爛鏡頭，結果都係買番個專用相機袋。呢個KATA袋夠輕便，真係幾正，加上唔算貴，梗係即刻入手啦！點為之好嘅相機袋呢，就係相機好重好大部，收入個袋之後都可以分散重量，猶如拎無反機出街咁輕便；而呢個相機袋就絕對做得到！

Michael Reporter

男人終極夢想

哪個男人不想有位完美女朋友呢？外形吸引是起碼條件，如果性格、喜好、專長都可以隨你心意而改變，就更是無得頂。小記早前買了隻藍光碟，故事內容就是如此，戲名是《書中字有夢女神》，講述男主角是靈感乾涸的小說家，正為新作煩惱時，小說內描寫的夢中女神竟然在現實中出現，而且只要在打字機上打上新描寫，女神就即時變成絕不囉嗦，過程中自然引發不少搞笑情節。套戲輕鬆有趣、幾好睇，唯一不滿是戲名，想食「書中自有黃金屋」，但有點夾硬來，不似得「插班女學生」之類的戲名，食字食得不留痕迹。

Angus Reporter

120菲林體驗記

有人話，影相係一件好Decent嘅事！係呀，如果你影緊嘅係120菲林，影得唔好時，並非如數碼相般可以即時Delete，每次撳Shutter都係錢，唔Decent唔得！筆者剛剛玩過部新出嘅Lomography Belair X 6-12 Jetsetter「風琴式」相機，復古設計，確係非常靚仔，而且只售二千幾蚊，唔算好貴！不過120菲林同沖菲林嘅錢相當襟計，一包三Pack 800度120菲林盛惠$148，除開約$50一筒，不過影6×12，一筒菲林就只影到12張，沖一筒仲要$125，皮費真係唔輕o架！當然啦，如果影6×6沖出嚟會平啲囉。

一日未去攞相都唔知效果會係點，但最重要係影相時嘅過程夠Enjoy，個心囉囉攣嘅感覺都幾好Feel！

Brian Reporter

合金魂蜘蛛俠

資深玩具迷應該知道，日本東映曾經向美國Marvel買過《蜘蛛俠》嘅「拉臣」，自己詮釋故事，拍咗套日版《蜘蛛俠》特撮片，集合了英雄及機械人兩大元素，令片中蜘蛛俠能夠揸住部戰車飛入空中嘅母艦體內，再變成巨大機械人跟怪物肉搏。早年超合金魂就出過呢隻玩具，跟盒仲送埋隻七吋空心膠「蜘蛛俠」，不過產品冷門非常，冇乜人吼。筆者前幾日無意中喺兆萬地庫嘅玩具舖遇到佢！而且仲要全新未開賣六舊水，雖然近月買玩具買到出血，但物以罕為貴，行咗個圈最後都扑錘。唉，真係愈窮愈見鬼！

Alfred Reporter