百步穿楊《水果射擊Fruit Shoot》

大家劈生果就玩得多，射生果又試過未？呢隻玩法好似Angry Birds的《水果射擊Fruit Shoot》射擊遊戲，玩家可以選擇印第安、斯巴達和維京人的所屬場景，輕點屏幕拉弓，再調整角度和力量，放開手就會自行射擊。至於射擊目標當然係水果，仲會擺放在熊人、斯巴達士兵或飛龍頭上，萬一「撻Q」射中頭，更會有噴血效果！唔想咁血腥的話，可以設置「Blood Off」。遊戲還提供挑戰模式及對戰模式，等你與好友一鬥眼界。

支援平台：Android 2.0以上　

下載費用：免費

龍種育成《DragonVale》

龍係古代神話的瑞獸，是否存在過到現在還是一個謎，但原來想搵到龍呢一種生物唔難，因為《DragonVale》就是以養龍為題材，玩家唔單止可以見到不同種類的龍，更能夠為龍配種、飼養和育成，培育為多種屬性的強大巨龍。大前提是需要經營屬於你的龍谷場，以賺取金幣開發不同的設置，仲可以拜訪朋友賺取禮物。遊戲的特色是華麗的背景和美妙的音樂，加上龍種應有盡有，中國龍、西方龍，甚至恐龍均收錄其中，還有少量的隱藏龍種，要集齊就要花點時間和心血。

支援平台：Android 2.3以上、iOS 4.1以上　

下載費用：免費

超越時空打怪物 《Army of Darkness Defense》

超越時空呢條橋，很多電影和劇集都用過，而《Army of Darkness Defense》就係用呢條絕世好橋打出名堂。故事講述主角Ash本是現代人，因奇怪的魔法而回到中古世紀，然後誤打誤撞率領軍團對抗魔物兼守護城堡。淨係聽故事背景都夠吸引，其實遊戲係結合動作和塔防元素，玩家需要不斷擊退前來的魔物，還可以召喚傭兵支援和使用絕招。既然以超越時空為亮點，主角所使用武器肯定唔係刀劍，而係霰彈槍、電鋸等現代武器，打怪都型過人。

支援平台：Android 2.1以上、iOS 3.0以上　

下載費用：免費

RPG不變定律《打怪！練功！衝裝備！！》

有玩開RPG（角色扮演）遊戲的朋友，一定體驗過打怪、練功和衝裝備這不變定律；而遊戲《打怪！練功！衝裝備！！》就正正將以上定律全面發揮，消磨時間一流。遊戲中可選擇戰士、弓箭手和魔法師，而且每關都可以轉職，令職業不受限制。不過想輕鬆過關，最緊要都係靠衝裝備，玩家能夠將手上的裝備衝至上限「+30」，如衝裝的成功機率超過50%以上，就要睇你運氣。遊戲可以招募其他玩家為僱傭兵幫手通關，代價係要付出一定的虛擬幣。如果唔想益街外人，咁就記得叫齊朋友齊齊玩喇！

支援平台：Android 2.2以上　

下載費用：免費

重投經典大富翁《大富翁4Fun》

假如大家出生於七、八十年代，就算未玩過都應該聽過經典電腦遊戲《大富翁》，內裏的角色如阿土仔、孫小美等，係唔少人的兒時回憶。估唔到今時今日，呢班角色依然健在，還登陸到《大富翁4Fun》，讓你重拾經典。基本玩法應該大家都好熟悉，不外乎擲骰仔、買地、起樓，仲可以控制步數、強奪土地、拆樓等來扭轉局勢，以增加遊戲的變數。雖然現實中未必人人都做到大富翁，但《大富翁4Fun》可以畀你達成呢個願望。

支援平台：Android 2.3以上、iOS 4.3以上　

下載費用：免費

感染人類做喪屍 《Brainsss》

十隻有九隻同喪屍有關的遊戲，玩家都係扮演人類對抗喪屍或全力逃亡，而今次介紹的《Brainsss》就有少少唔同，玩家會透過俯視角度來控制一群喪屍，每關起初可以控制零星的喪屍，目的是感染場內的人類，以壯大喪屍軍團。唔好以為遊戲只係行行企企咁簡單，因為人類的槍械火力很猛，稍一不慎隨時全軍覆沒，既緊張又刺激。呢類小品遊戲，可考驗玩家的戰略和反應，但要小心「被毒」。

支援平台：Android 2.3.3以上、iOS 5.0以上　

下載費用：免費