《古惑仔3G》手機爭霸

11年前隻PC Online Game《古惑仔Online》真係Hit到爆，依家過咗咁耐，鄭伊健變成羅仲謙，陳小春都變咗梁烈唯喇，所以最新一集古惑仔Game《古惑仔3G》都由PC跳到手機、平板平台，隨時隨地搭車都玩到！玩法方面，都離唔開收o靚、搶地盤同建立自己社團，唔知可否延續當年嘅盛世呢？抑或家陣社團都興「以和為貴」？

多平台大混戰

改頭換面嘅古惑仔電影就快上畫，手機Game《古惑仔3G》亦食住個勢同期推出。本作最唔同係可以放落流動平台上玩，仲有齊iOS版同Android版，即係話大家拎住主流嘅智能手機同埋平板電腦就可無時無刻咁「芒」住個社團。據Gameone所講，有計劃將來會推埋《古惑仔3G》嘅網頁版，到時就可以幾個平台大混戰喇！

改霸氣社團名

遊戲玩法係模擬一個社團運作，玩家就係揸Fit人，由收o靚 、搶地盤到買賣都要一腳踢，勞心勞力。一切都要先由創立社團開始，大家要諗個有霸氣嘅社團名稱，又或者上討論區求人幫你改名亦得。電腦會識得自動幫大家組成一個字頭，建立社團後，第一件事就要壯大社團嘅規模，遊戲入面只需要花10點氣力就可收一次o靚，至於所收嘅o靚皆係嘍囉，可唔可以發圍就好睇大家嘅彩數！有人手之後就要出去搶地盤，遊戲當然係用香港實景，仲有成條地鐵路線畀你玩，由荃灣打落尖咀再落灣仔。

買定藥水去劈友

遊戲有相當多「動作成分」，搶地盤未必如想像中咁易，因為隨時有幾廿人把守地盤，就算帶幾多兄弟去都隨時損手爛腳，所以就應該好似玩RPG遊戲一樣，一定要帶多啲藥水去補血，唔係多多都唔夠死。每位手足都有一定嘅健康值，如果傷得太重，就需要「入廠」治理，醫藥費當然要找數！搶地盤之外，仲可以去掃場或者晒馬同劈友，「響朵」之餘又可以賺外快。於「劈友系統」入面，玩家可以搵到差唔多Level嘅對手，打起嚟會刺激啲！遊戲仲有個幾有趣設計，就係打完目標物後，可以玩「21點」來決定擸到幾多戰利品走；如果運氣好的話，仲有兄弟主動跟你添！

INFO

類型：經營及動作

開發：智傲網絡科技

伺服器：香港伺服器

平台：iPhone、iPad、Android

推出日期：今日封測

網址：http://tb3g.gameone.com/