EX合金柔王丸Take 2生猛晒
拍足幾年嘅名導功夫片終於上畫，相信又會成為全城話題；講到功夫片，唔係香港電影嘅專利，80年代嘅經典動畫《模型神童3四郎》，一眾機械人唔用刀、唔用槍，硬橋硬馬喺擂台上以真功夫過招，成為科幻動畫中嘅一路奇兵，主角柔王丸正係柔道高手。已故鬼才模型師佐藤拓所監修嘅EX合金柔王丸，最近以追加滲線，以及改用動畫配色重新推出，喚起各位70後、80後唔少美好回憶。
換色加線更細緻
其實EX合金之前都出過柔王丸，不過舊版身上嘅奶白色油得太厚，扭動關節時難免容易甩油，亦都間接影響活動能力；再者本體、頭盔、膊頭、小腿等地方都刻線欠奉，跟動畫造型有一定差距，以致坊間評語好壞參半。今次新版嘅最大改善，係用陶瓷白代替奶白色，質感更討好，而且加入大量劃線、箭嘴識別及文字標示，成隻當堂Detail晒！此外，舊版附件之一嘅白色道袍，今次換成兩條搏擊冠軍腰帶，分別印有日本冠軍「JPWA」及世界冠軍「WPWA」字樣，中間嘅飛鷹浮雕及拉花圍邊都有細緻雕工，皮帶上嘅徽章亦有出色塗裝。
可動能力爭番啖氣
EX合金一般被稱為「合金首辦」，事關關節活動能力往往比唔上Bandai嘅「超合金魂」，新版EX柔王丸終於省靚招牌，皆因內藏豐富關節，好似連接膊頭及胸部位置用咗分件處理，強化聳肩效果；頭頸部分亦可扭動、髖關節嘅球形榫位又增加擘髀幅度，加上前腳掌可以向上翹，比起同系嘅「真三一」更加好扭。
另一方面，柔王丸全身超過一半地方用Die-cast製成，墜手足秤，可惜受力關節改用大大塊嘅PVC齒輪連接，轉動時雖然會「咔咔」聲響看似實淨，但久而久之，例如腳掌等最受力嘅位置，有機會因年月久遠而無力承托，玩家惟有多加小心、就住就住。
(c)1983 牛次郎/秋田書店．東寶．ADK
查詢：2390 9843
Fewture Models EX合金《模型神童3四郎》柔王丸（Modeling Color Version）$1,680
配件唔算多，主要係飛行裝備及冠軍腰帶，而開掌造型手掌只有姆指可動。
日本搏擊冠軍「JPWA」腰帶，中間有金色飛鷹浮雕。
世界搏擊冠軍「WPWA」嘅腰帶，有大大個紅色皇冠，飛鷹圖案就變成銀色。
膊頭及胸部之間用咗分件關節，強化聳肩效果，可惜有利亦有弊，做唔到雙手橫放動作。
陶瓷白塗裝比舊版薄，滲線效果亦明顯得多。
裝上具有摺疊機翼嘅噴射飛行背包，以及腳踭推進器，就可重現飛行甫士。
展示台座嘅金屬支架有伸縮功能，方便調整甫士高度。
隨盒提供開掌造型手，但接口窿位太細，玩家需要用風筒軟化塑料，先可以擴大接口闊度。