《The Simpsons：Tapped Out》重建春田

Simpsons呢齣卡通Hit足廿幾年，老竇Homer、阿媽Marge、阿仔Bart、阿女Lisa同Maggie更加成為家傳戶曉嘅角色。卡通中成家人搗蛋又搞鬼，原來喺遊戲入面一樣咁過癮，所說的就是剛於AppStore上架的《The Simpsons：Tapped Out》。話說Simpsons一家所住嘅Springfield因為Homer搞出核爆而被夷平，玩家就要帶領眾人重建城市，好大責任呀！

重建城市靠「冬甩」

遊戲同一般城市建設遊戲玩法一樣，不過主角就變成Simpsons一家。要重建成個城市，就要一步步起屋，而興建唔同建築物所需嘅時間都唔同；玩家可以透過不同任務去賺取金錢及「冬甩」，前者用來搞建設，後者則可以加快興建速度。而不同人物都有特定的任務，最搞笑是對白以至任務都好切合角色性格，好似Homer就有「扮滑雪」、Lisa就有「做功課」等等，Simpsons粉絲肯定玩得更投入。

支援平台：iOS 4.3

下載費用：免費

《Big Win Basketball》籃球卡Game

遊戲玩法與籃球卡Game一樣，起初會畀五個球員砌一隊籃球隊，再透過贏比賽賺錢同金幣，之後就可以去買能力值更高嘅球員卡，極之耐玩。

支援平台：iOS 4.3

下載費用：免費

《Geomaster 2》考你地理

屬於學術性遊戲，電腦隨機顯示地名，再要喺限時內於地圖內篤番正確位置，熟地理嘅朋友就自然有着數，玩得更投入。

支援平台：iOS 4.3

下載費用：免費

《Paperland Live Wallpaper》桌布變天

圖案以卡通風格繪畫，最特別是會隨天光、天黑而轉變，仲有海灘、沙漠等不同主題，有時仲會出現彩虹、雀仔等景物，包保次次着芒都又靚又有驚喜！

支援平台：Android 2.3

下載費用：免費

《Super Penguins》企鵝勇士

玩法似足經典作《古惑狼》，不過主角換成得意嘅企鵝，邊行要邊食魚之外，仲要跳過好似八爪魚等障礙物。儲夠魚仲可以幫隻企鵝換吓形象，過癮！

支援平台：Android、因裝置而異

下載費用：免費

《Parking Star 2》泊車能手

早排睇YouTube，發現有唔少泊車失敗嘅短片，仲畀網民瘋狂恥笑，超可憐！唔想成為呢類「受害者」，就一定要玩呢隻《Parking Star 2》。咪以為遊戲就一定兒戲，因為遊戲操作方法以至泊位技巧都十足真實泊車，玩完真係以為自己啱啱補完鐘！

連線鬥快泊

好多人都認為泊車係考牌入面最難嘅一關，新Apps就畀機會大家練到熟。遊戲有40關畀你慢慢泊，簡單嘅L位以至複雜到要五、六手軚先泊到嘅位都有，要有番咁上下耐性先玩得掂。遊戲期間用家更會獲得星星，可以增長限時或提升操控。遊戲更支援跨平台藍芽雙打連線，可以跟朋友於同一版圖下鬥快泊好，都幾刺激o架！

支援平台：Android 2.3、iOS 4.3

下載費用：免費