《DmC Devil May Cry》華麗挑戰

點解《Devil May Cry》嘅「但丁」會咁似蠱惑仔，仲要係「謙謙」版呢？只因Capcom想為推出到第四集嘅遊戲求變！招駁招華麗風格係遊戲系列嘅賣點，好難變；惟有從主角方面着手；新作《DmC Devil May Cry》主角但丁既換上一身「蠱惑」Look，仲要變成天使同惡魔嘅混血兒！另外今集有得畀但丁發動「天使模式」同「惡魔模式」，用唔同風格武器打人，向「SSS」最高評級目標挑戰！

但丁改頭換面

前幾代《Devil May Cry》主角但丁都係一頭銀髮、着住長袍，型格中帶點邪氣。今次《DmC Devil May Cry》主角雖然都係叫但丁，但就變成黑短髮、穿汗衣，造型較粗獷；好在仲有件長袍頂住，唔係都幾難認得出係佢。由於劇情需要，新但丁亦唔再好似以往一樣，標榜係人類同惡魔的混血兒，以打倒惡魔為目標；反之變成天使同惡魔混血的「涅法雷姆」人，因為咁就可以同時使用天使或魔血系列的武器。敵人亦唔單純係惡魔，而係識得玩弄政治同經濟手段去操控人類嘅高智慧種族。老實說，唔理係惡魔抑或高智慧種族，最重要都係劈得夠爽！

天使惡魔模式任轉

既然玩天使同惡魔混血兒設定，具備天使同惡魔屬性的武器就可順理成章地出場。對付過場嘍囉，用招牌長劍Rebellion同雙槍Ebony & Ivory等一般武器就可輕易應付；如發覺有啲敵人打極都傷唔到佢，就要轉用天使或者惡魔模式。幾時用天使、幾時用惡魔屬性武器攻擊呢？當敵人身上散發青白色光芒的話，應轉去天使模式攻擊，武器種類會以輕盈快速為主；如果敵人發出紅光，就用較重型的惡魔武器攻擊。之前推出的試玩版中，新但丁已可使用速度快、連招多嘅天使鐮刀Osiris，以及較笨重但攻擊力強的惡魔大斧Arbiter將敵人打到飛天。

駁連招拎SSS級評價

當然，本作唔係樣樣都改，以往《Devil May Cry》嘅華麗動作、超多連招以至評分系統等精髓都保留起來，大家可以盡情諗計去混合刀劍同槍炮等各種連招打低眾多敵人，將評價提升至最高「SSS級」；大家一樣可以使用原作嘅「惡魔扳機」功能，同時按下左右Analog掣，就會將身邊敵人彈到空中，並趁機會盡情出招。《DmC Devil May Cry》都要靠收集打低敵人所得嘅白色寶珠來買技能，前作就買完無得回收，想買新招就需要再儲，但今集就可退回技能、換番寶珠再買新嘅技能。本作打擊爽快感仍在，但比較失望係仍未有連線功能，呢方面日本遊戲廠真係要諗諗計先得！

INFO

類型：動作

開發：Capcom & Ninja Theory

平台：PS3、Xbox 360

推出日期：1月17日

售價：約$328

查詢：2366 1001