糖妹×Takki 復古鏡孖住儲

眼鏡款式多不勝數，粗框、金絲、無鏡片、圓形、方形……還有搞笑又可愛的Party鏡，可見眼鏡早已變身配飾潮物！原來糖妹和Takki（王若琪）都有儲眼鏡的習慣，不過最愛的並非最潮、最出位的新設計，反而復古鏡才是兩人的那杯茶，愛其夠獨特，又唔會同人撞款，實行「古老當時興」。

由愛上到收藏，糖妹和Takki都有一段大同小異的故事，糖妹自言幼時討厭戴眼鏡，更因為驗出近視而被媽媽責罵，上中學她才接受現實：「當年好少人會戴Colorful嘅眼鏡返學，既然校規無限制，我就揀咗副紅色眼鏡囉！」至於Takki愛眼鏡的因由，原來是不少小朋友的心聲，她回憶道：「小學開始已經鍾意戴眼鏡，因為細個覺得好型，所以會拎爸爸副老花鏡嚟戴，好在冇搞到損害視力咋！」

糖妹至冧圓框鏡

眼鏡款式多不勝數，糖妹偏好復古類別，原來由一齣電影開始，她話：「睇完《哈利波特》就鍾意咗圓框眼鏡，貪佢夠得意，戴咗個人又細個啲。平時喺香港，會去花園街或者百利留意吓，去旅行就搵跳蚤市場或者二手店搜羅，有時見到超級鍾意嘅款式，真係會唔理啱唔啱自己都照買。」收藏最重要有知音人，擁有接近20副眼鏡的糖妹，便經常跟Takki交換心得，Takki也認為：「眼鏡已經成為時裝嘅一部分，無論太陽眼鏡、復古鏡定係Party鏡我都會買，如果有Sponsor，更加方便襯衫同開Party。」

Takki鍾情70s款式

潮流興懷舊，大街小巷都不乏昔日風格的眼鏡，但兩人的心頭好，並非單指款式，還會考究到甚麼年代生產，Takki解釋道：「好多香港買到嘅真Vintage眼鏡，通常都係70年代生產，眼鏡舖老闆將以前嘅貨尾搬出嚟賣，真係賣一副少一副。」隨着潮流循環，當年舊貨都變成現今潮物，往日數十元一副的眼鏡，現已升值至數百、甚至數千元不等，Takki補充道：「平日都會喺北角和平或者九龍城上目入貨，嗰度賣嘅都係真正Vintage眼鏡，有啲仲係手製品，非常珍貴。」看見Takki花費過萬元收藏眼鏡，糖妹自言不捨得：「自己都試過喺日本同台灣花幾百元入貨，其他收藏品大多數係朋友送，因為真正嘅Vintage眼鏡好貴o架！」

熱心追尋細節位

除了注意年份，兩位小妮子對鏡框的細節位都非常有研究，Takki表示：「我特別注重內框嘅設計，可能表面上係一副黑色粗框眼鏡，但內框就有紅白格仔，就係呢啲細節位，令到眼鏡變得不平凡。」糖妹深感同意，續說：「又好似個樣普普通通嘅金絲眼鏡，只要細心睇，就會留意到其實內藏雕花位，如果係人手雕刻就更珍貴，加埋特別設計嘅眼鏡盒，真係唔買唔得！」二人笑言眼鏡最吸引之處，就是它的細微設計，可以令佩戴者變得與眾不同，肥姐、方大同與盧廣仲就是非常突出的例子。