一蚊一支筆

常聽到同事說：「打份稿畀你。」今時今日，稿是用電腦打，不再是寫落原稿紙了。可是小編的工作，卻是寫多過打。各位讀到的一字一文，都有編輯在背後執筆改改改改改，一字一淚啊！加上文書、行政、填表等工作，皆成功爭取原子筆非常短壽。日前行工展會，鮑魚、冬菇、餅乾、豉油統統吸引不到我，反而買了一大堆「日用品」—原子筆，一包十支十蚊雞，亦即一蚊一支筆，抵到不能自拔地紅、藍各買十支，分分鐘夠我用一年！結果我個筆筒插滿得猶如盆栽一樣，何其壯觀！

Tony Editor

有Heart芝士蛋糕

上月正是小記牛一，雖然如同往常一樣要返工，不過點都要切生日蛋糕慰勞自己。呢個「福如牌」出嘅號稱北海道芝士蛋糕個樣都幾靚，點知唔食猶自可，一食就真係停唔到口！本人查實唔太鍾意食Cream，不過佢隻Cream加芝士再用Oreo餅底製作，實在太有Heart、太好食了，唔經唔覺一個人竟然成個食晒！

Michael Reporter

人生有個真正朋友

大家唔好以為呢隻係Mouse，其實佢係屏幕嘅色彩校正器。你知啦，小記經常都要影相同執相，啲色唔準就好麻煩，所以特登買隻Spyder4搞搞個芒。知情者都知呢隻校正器唔係Cheap嘢，點解小記要大破慳囊？是咁的，其實本身有隻Spyder3，朋友叫到就借了給他，殊不知對方整唔見咗！唉！如果唔Friend早就叫佢賠，仲使乜自掏腰包呀！唔知大家身邊又有無一兩個呢種Best / Bad Friend呢？

Jason Reporter

新女神 麥玲玲

小弟無C君同陸永咁好彩，有麥玲玲師傅面授機宜，但幸好每年都有機會訪問佢本人，獲贈親筆簽名運程書乙本。不經不覺，今年已經係第四個年頭，但比起書中內容，今年封面更「吸睛」，皆因玲玲姐不但下巴尖晒，條腿瘦晒，黃蜂腰歷經四年仲愈來愈幼，成個人變到o靚模咁索！話唔定繼香香公主後，下個宅男女神就係佢！

Gilbert Reporter

荷里活大隻佬潮的原點

曾幾何時，荷里活有很多大隻佬一線演員，史泰龍、阿諾舒華辛力加等等，但漸漸觀眾的興趣由胸腹上的筋肉，轉移至樣貌、演技，甚至更難觸摸的性格上，近年已很少見有大隻佬演員能擔當荷里活一線大片的主角。重睇這套藍光版《洛奇》時真是感觸良多，1976年的作品，史泰龍擔任編劇及主演，當年不單大收旺場，史泰龍更憑此片獲奧斯卡最佳男主角提名，更一拍拍了六集之多。三十多年前的作品，當然不能期望畫質同《阿凡達》有得比，但經數碼修復後，雜訊問題已有明顯改善，直情覺得史泰龍靚仔晒，招牌的木獨表情睇落好似冇咁木獨。

Angus Reporter