ES大空魔龍必搶初回鍍金版

雖然筆者係80後，但自細打《機戰》打到大，故此對70年代嘅超級系機械人中晒毒、入晒腦，好似早前兩款日系MB合金萬能俠，都即時科水捧場，本地薑Action Toy亦都迅速接力，啱啱出咗ES合金第9彈「大空魔龍」，造型嚟自《新大空魔龍》嘅主役機體，最大賣點係可以同跟住推出嘅第10彈「大地魔龍」及「天空魔龍」換件合體，而且初回限定版送埋閃令令鍍金魔龍頭，加上唔使四舊水有交易，難怪成為今期嘅熱搶Item、有買趁手！

含金量高　關節任扭

《新大空魔龍》嘅Gaiking，屬於70年代同名動畫《大空魔龍Gaiking》嘅重製版本，造型保留當年神髓，劇中由魔龍頭、雙手連身體、腰連下半身三部分嘅合體Gimmick，ES就足本移植過嚟，只係龍頭由於Q版關係，未能做到完全變形，需要拆走雙角，然後轉插落機械人嘅頭上。貴為合金玩具，ES Gaiking嘅「含金量」相當高，其中胸部嘅魔龍頭，以及下半身都採用Die-cast製成，足料墜手。

關節方面亦都照顧周到，膊頭及腳掌都有延伸關節，增加扭動幅度，手肘及膝頭又可以90°屈曲，而且關節結實，唔怕愈玩愈鬆。最精彩係初回版本附送鍍金魔龍頭，比起正常版嘅啞金色，質感當然強得多，就連胸部配件都係金屬物料，廠方可謂賣大包。

武器齊全　設計周到

關節咁襟扭，自然擺到多款戰鬥甫士，隨盒亦跟咗大量武器，例如印咗骷髏標誌嘅圓盾，以及巨型雙刃斧等，後者仲可以收喺圓盾內側，至於故事中由膝頭嘅紅色十字鏢變化而成嘅長槍，由於槍頭跟槍桿係分件處理，方便套入拳頭內，又唔怕刮甩油。除此之外，兩邊膊頭內藏榫位，可安裝有鐵線連接嘅飛索，可以隨意屈曲形狀，呈現劇中嘅發射效果。窩心提示，由於ES Gaiking可以跟隨後推出嘅同系「大地魔龍」及「天空魔龍」換裝合體，從兩部機體拆走四肢組件再重新組合，所以有買或者準備入貨嘅Gaiking粉絲，記得儲定銀彈入齊全套。

(c)TV朝日．東映Animation

查詢：2390 9843（Action Toy Ⅱ）