Wii U應節Party Game預埋你

大節流流，有乜慘得過自己一個人對住部電視玩單打Game？要玩都約埋班朋友玩Party Game啦！今個聖誕嘅主角當然係新出的Wii U主機，捧住GamePad玩Game夠特別，只要用埋Wiimote就可以幾個朋友一齊玩，最多支援五人同樂添！至於最啱玩同埋最有氣「Fun」嘅遊戲，莫過於任天堂自家推出嘅《Nintendo Land》同《New Super Mario Bros. U》！

《Nintendo Land》玩盡GamePad功能

當年Wii推出時，嗰隻《第一次接觸Wii》就以迷你遊戲試玩Wiimote功能；無獨有偶，《Nintendo Land》都可以畀大家試盡有6.2吋輕觸畫面嘅GamePad功能。《Nintendo Land》以主題公園式包裝，入面再分成12個唔同區域，即係有12個迷你遊戲可玩。而玩法主要分三類，包括單打、對戰玩法同團隊玩法。而六款只支援單人模式的迷你遊戲，主要係靠篤芒、捽芒同GamePad內置嘅陀螺儀控制轉向。當中至好玩的，係可直度拎住部GamePad瞄準畫面再捽芒放飛鏢嘅《手裏劍道場》，以及可左右傾斜部GamePad幫Donkey Kong碌到終點嘅《Donkey Kong's Crash Course》。

星級陣容撐場

至於對戰玩法同團隊玩法，實則上都係以拎GamePad嘅玩家做主家。對戰玩法係GamePad玩家同其他拎Wiimote玩家抗衡，一係我捉你，一係你捉我；而團隊玩法就要大家合作完成一件差事，拎GamePad嘅玩家可用不同招式，所負嘅責任都唔同。

而好多任天堂系列嘅明星角色都會喺多人模式中現身，好似《薩爾達》林克、Mario、Luigi等，部分遊戲可支援GamePad玩家並加多二至四名拎Wiimote玩家，最多可以五人一齊玩。對戰遊戲方面，好似《動物之森：糖果祭》，拎GamePad玩家負責追偷糖果嘅其他玩家，可用GamePad上左右冬菇掣控制兩個守衞追捕，其他玩家就負責偷。合作式玩法又再唔同啲，例如《薩爾達傳說：Battle Quest》，拎GamePad玩家負責用弓箭，其他拎Wiimote玩家就會用劍聯手打低敵人，玩法方面都幾多變化，玩得過癮！

INFO

類型：主題公園式遊戲

開發：任天堂

售價：$399（日版）、$418（美版）

《New Super Mario Bros. U》天使魔鬼任你揀

Wii U對應高清輸出，毫無疑問《New Super Mario Bros. U》嘅遊戲畫面會靚過之前Wii版瑪利歐。另外新版本都加入唔少新角色同新模式氹玩家，好似有「飛鼠Mario」以及新同伴「氣球迷Yoshi」和「泡泡迷你Yoshi」；遊戲模式亦有強制推進畫面的「推進模式」。不過最特別都係可以支援五人一齊玩，拎GamePad玩家嘅角色同拎Wiimote或Classic手掣嘅玩家唔同，可以講係擔當指導角色，只要一篤GamePad畫面就會加入一件磚塊（最多可加到四件），即可接住就嚟跌死嘅其他玩家，或者整個跳台畀其他玩家跳到好高好遠嘅地方。不過呢個都只係「天使」式玩法，如果大家係「魔鬼」的話，可以啟動「邪惡玩法」，專登整啲磚塊阻住玩家前進！喺Party Mode入面，輕觸GamePad畫面仲可以啟動機關同埋直接打低敵人添！

INFO

類型：動作

開發：任天堂

售價：$488（日版）、$478（美版）

其他Wii U Party Game推介

《Rabbids Land》

賤兔一向都係Party Game嘅常客，今個聖誕又點可以唔預埋佢哋一份！在Wii U上推出嘅《Rabbids Land》當然有用盡GamePad帶來嘅可能性，可以用佢嚟瞄準、翻轉物件、駕駛，甚至玩家對住佢大叫入指令添！

《Sports Connection》

從遊戲名稱都知佢係運動遊戲，收錄嘅運動都算大路，好似高爾夫球、足球、美式足球、棒球及網球，最特別要算係有得玩高卡車，仲可以GamePad配合四個Wiimote一齊玩！

《Wipeout 3》

玩競技遊戲，即係周不時可以喺外國或日本電視節目所見到嘅競技障礙賽，不過玩遊戲嘅體力要求並無真玩咁高，從滾筒上撻低都唔會又瘀又痛，只會換來大家嘅笑聲！

買美版抑或日版Wii U好？

其實好取決大家鍾意玩美版定係日版遊戲，因為Wii U同以往一樣有分區碼。美版遊戲用英文介面，大家較容易理解；至於日版遊戲就有較多Hardcore機迷耳熟能詳嘅作品，好似日版Wii U護航作《Monster Hunter 3（Tri）HD Ver.》。至於目前美版同日版主機價錢都好接近，Game舖老闆話暫時兩者銷情旗鼓相當。

查詢：2359 7998