Topshop終於嚟啦!

H&M、Zara、Forever 21、GAP、Monki、就連AEO、A&F同Hollister都已經喺香港開舖，等到頸都長，望穿秋水Topshop終於宣布登陸香港！並鐵定明年5月開業，其實Topshop來港吹風吹咗好多年，早排品牌終於正式落實，會同Lane Crawford旗下的LAB CONCEPT合作，開設首間香港專門店。其實Lane Crawford之前已同Topshop合作，引入Kate Moss × Topshop系列，所以順理成章兩大陣營今次拍住上打開中國市場。新店位於中環皇后大道中泛海大廈、即中環H&M對面、前中藝位置，兩層高的店舖面積約12,000平方呎，網羅品牌服飾皮鞋化妝品等多個種類。依家除Online Shopping之外，最近嘅入貨點就係新加坡，不過當地入嘅貨色確係麻麻，希望今次香港店會識揀啦，最好係Topshop Crossover、Boutique同Unique呢類正嘢！

Sanna‧Senior Reporter

愛上胡桃夾子

最近收到品牌Send嚟借映相嘅Nuts Cracker音樂盒，一見到就非常開心，點解？因為佢好似部時光機咁，帶我回味過去！因為我最like聖誕節兼Christmas Songs，而佢會一邊播音樂一邊打鼓，聽住佢就會諗起以往聖誕節嘅開心時光、細個去尖東睇燈飾影靚相、讀書時無後顧之憂玩天光，大家交換禮物的日子……即使現在未必能盡興，聽住佢望住佢，就已經令我心滿意足！

Wish you all Merry Christmas!

ki ki‧Reporter

兩大潮流狂魔合作

早排同事M，訪問咗專程來港嘅Jeremy Scott，J先生當時話遲啲會同佢老友「醫神」陳奕迅合作，我頭頂即時彈出兩個問號：1.吓，佢哋有咩搞呀？2.乜原來佢哋係老友嚟o架？

好啦，最近佢哋嘅結晶品終於面世，就係以下呢款adidas Originals by Jeremy Scott 2013春夏季—JS Wings限定版波鞋。呢對鞋極之中國味，花花碌碌，據聞寶藍色係代表古代中國王室雍容華貴的氣度，同時間凸顯出Eason喺香港以至亞洲音樂界嘅王者地位，至於牡丹圖案，就係中國傳統富貴吉祥的象徵。粉絲最關心係幾時有得買，唔使等好耐，明年1月4日喺adidas Originals Concept Store、J-01、Lane Crawford同I.T正式限量發售，不過我就關心以下呢個諗法會有幾多人認同，就係我覺得Jeremy Scott其實好鬼似黃秋生，唔知你哋點睇？

Amy‧Editor

BB熱爆棒球褸

作為韓流中毒者，除咗撲飛睇Bigbang演唱會，更加會留意演唱會的紀念品！可惜當小記到達會場時，所有的紀念品竟然近乎售罄（就連必備的皇冠燈都賣晒！），為咗滿足自己的購物欲，所以決定轉戰YG Offical的網店。一Click入網站已經雙眼發光，因為店內所有Souvenir款式齊備，就連熱爆的Baseball Jumper都有貨，設計浮誇之餘，左臂上更有齊五位成員名字的襟章，但如果覺得太「毒」的話亦不妨留意一下GD的「ONE OF A KIND」Hoodies。小記依家仲心大心細未決定買唔買好，如果買咗的話一定會着上身同大家再作分享！

Alex‧Reporter

末日前的大爆炸

對於末日論我已經無晒感覺，皆因此生無憾，因為能夠在末日前一睹Bigbang的Live Show，除演出精彩，就連演唱會的精品都大受歡迎，所以小記尾場只能入手到頭箍同閃燈。好彩，早已託睇首場的同事S和I幫手買Tote Bag，實用又好看！

Yilam‧Reporter