on.cc 東方互動主頁

AQUOS PHONE ZETA SH-02E IGZO新世代靚芒

日本人非常重視聖誕節，兼且視之為送禮嘅好時機，因此日本手機廠商年尾例必發布新產品應市；好似Sharp就趁年尾夥拍電訊商docomo推出旗艦作SH-02E，集四核心處理器、千萬像素鏡頭、防水防塵、高清大靚芒等東瀛手機優點於一身，一眾行貨手機即時被比下去，當做聖誕禮物送畀身邊人，收到肯定冧！

近幾年「泡菜國」嘅手機發展步伐超快，為免落後於人，今次Sharp便將時下最Hit嘅手機元素統統擺入新機內，無論硬件規格抑或使用體驗，都比韓國、歐美大廠嘅Android手機有過之而無不及，絕對令人眼前一亮。

IGZO新研慳電靚芒

雖然此機名為AQUOS PHONE，不過用的卻非AQUOS芒，而是廠商新研製的IGZO屏幕。其4.9吋屏幕，更比其他Smartphone嘅左右邊框來得幼，僅得3.8mm，令到機身配大芒之下，外觀都唔算臃腫；即場拍埋iPhone 5以及GALAXY S3兩大靚芒代表一比，對比度、色彩鮮艷度以至細緻度都唔輸蝕，亮度甚至比前兩者更高，日光直射下依然睇得清清楚楚。據廠商表示，IGZO LCD屏幕較舊有TFT技術慳電得多，一般情況下着芒睇相可以長達24小時，時間足足是舊技術的4.8倍，配合內置的2,320mAh電池，小記影相、上網兼玩Facebook，正常使用下仍然可以頂到超過15小時，表現相當唔錯！

筆仔記事兼畫畫

除了慳電之外，靈敏亦是IGZO芒嘅另一優點，一般網頁上嘅連結等細小位置，唔放大之下依然可以準確辨認到；最神奇係此機附送一支比膠囊藥丸大少少嘅觸控筆，配合內置嘅Quick Tool Box TX功能，搖機兩下就可以即時進入「KAKU Notepad」，可以喺畫面上用筆仔記事或者畫畫，似足紙上書寫。雖然呢支筆仔唔似得S Pen般支援筆壓，不過同樣無須電池驅動，而且筆迹準確兼冇遲緩；唔用時仲可以篤番入機頂3.5mm插口當耳機塞，真係貼心！值得一提的是，此機新增名為「Speech Launcher」嘅語音功能，手機待機時，用手指連敲兩下機背，就可用語音指令手機操作，例如開啟電話簿、地圖等等，辨識率仲幾高；可惜只限使用日語平假名發出語音指令，起碼要略懂日文先啱用。

強勁硬件打造

日系手機加入Android大家庭嘅日子唔耐，好多手機嘅硬件仲有啲過時添。反觀呢部SH-02E就進取得多，用家最期待嘅1.5GHz四核心處理器、2GB RAM一律具備，內置32GB ROM之餘，仲可以外加最大64GB記憶卡，堪稱「規格制霸」！另外，SH-02E仲繼承日系手機嘅特點，包括IPX5/7防水標準以及高像素鏡頭。當中相機鏡頭就高達1,630萬像素，可以拍攝出4,608×3,456像素的超大MB相片；而且內置多種拍攝場景，仲有HDR、移軸、魚眼、全景等多種拍攝模式；最重要係支援光學防手震，手持夜攝燈飾都見得人！然而新機亦有日系手機常見嘅弊病，例如只支援日本4G制式，由於頻譜不同，香港只能用到3G上網；亦只內置日英介面，用慣繁體中文嘅朋友就要適應下喇！