EB 1/4李小龍 高清Show肌

72年前，一位傳奇人物誕生，佢創立咗截拳道，令拳術再無門派之分；佢拍咗四套半電影，影響咗全球嘅功夫界，甚至係整個華人電影圈。李小龍先生，喺你離開咗嘅39年間，我哋依然對你念念不忘，頻頻為你造像致敬嘅Enterbay，早前就趁你冥壽當日發表咗全新嘅HD-1008，以1/4嘅大比例，高清重現你嘅每節肌肉、每條青筋，加埋雙頭雕，龍之風采再度震撼影迷。

以龍哥Figure起家嘅EB，近年動作多多，特別係首創1/4 HD Masterpiece，由T-800同Rambo都叫好叫座，今年稍後仲有T-800戰損版及幪面超人一號推出，閣下嘅玩具櫃細啲都擺唔落。至於今次嘅HD-1008，就係同系第三款作品，終於做番老本行，仲係龍哥首度嘅1/4 Action Figure，高達18吋，氣勢逼人！為咗方便擺甫士，所以開發咗全新嘅HD-8素體，全身關節有30個，可動性高之餘，肌肉紋理、膚色亦更加Human-being，招牌嘅六件腹肌及手臂青筋都忠實呈現，Fans們大可到門市睇住實物慢慢研究。

傳神雙頭雕

跟以往嘅李小龍雕像唔同，HD-1008唔只素體可動，連頭雕都可以換，全Set共有兩款，一個係正常冷靜Look，另一個係招牌嘅嘟嘴出招Look，兩者都出自頭雕師Scuderia手筆，並經Y.J.Park塗色監修。就貨辦所見，無論哪一款嘅五官、輪廓、頭髮以至膚色都拿捏恰到好處，向右睥嘅眼神更貫徹EB風格，簡單嚟講，就係重拾金亨彥時期嘅龍哥神似度。稍嫌不足係嘟嘴表情未夠浮誇，若果再肉緊啲、Chok啲就更有戰鬥格。

手快有Bonus附件

以往1/6嘅EB李小龍，幾乎套套電影造型都出過，今次1/4又用咗邊一款？為咗唔想玩家有舊酒新瓶、純粹放大嘅誤會，1/4龍哥並非單獨嘅某一套電影副產品，改以最傳統、最有普及性嘅功夫衫造型示人，當中包括灰色唐裝衫連功夫褲、白色背心，以及一對功夫鞋連襪；武器數目較少，只有長棍一支、雙節棍一對及兩條木製飛鏢，若果以為售價接近$3,000就有大把服飾、武器可換嘅話，今次難免會令你失望。不過首一千位買家會加送藍色包袱及登機證，龍哥有無得遊埠就睇閣下出手快唔快喇！

查詢︰2332 3615（Enterbay）