SR Aquarion EVOL 霸氣長拳

「河森正治」呢個大名，除咗同《超時空要塞》有關，大家又知唔知佢就係《創聖大天使》嘅機設大師呢？劇中Aquarion由三架戰機依不同次序反覆合體而成，複雜程度堪稱「現代版三一萬能俠」，河森嘅精湛演繹應記首功。今年初SR合金推出首作「Solar Aquarion」，以及早前嘅魂限金色版後，續集《創聖大天使EVOL》嘅主役機「Aquarion EVOL」亦於近日上架。新作大幅強化機體嘅可動性，又保留浮誇到爆嘅「無限拳」換件巨拳，仲新增出招特效膠片兩張，好玩指數再度飆升！

特效布景板 打孖上

宋太祖趙匡胤有「太祖長拳」，《創聖大天使》亦有無限延伸拳頭嘅「無限拳」，能夠一口氣由地球伸向月球表面，就算喺電玩《機戰》登場，其超長攻擊射程都係數一數二。作為進化版嘅Aquarion EVOL，「無限拳」特效當然唔少得，SR版本只需拆走右拳，換上一節大、四節細嘅手腕接駁配件，最後加埋個巨拳，配合支架承托就完成。SR仲追加埋「膠片」特效，當中一塊係印有招式名稱嘅布景板，放喺機體背後，就可原汁原味重現劇中嘅出招情景；另一塊印上「空間漩渦」，可以直接套喺手腕，表現出巨拳猶如從扭曲時空中飛出嚟嘅效果，迫力十足！

下肢關節 更好扭

雖然玩法跟之前嘅SR Solar Aquarion差唔多，但係今次Aquarion EVOL嘅造型就有明顯分別，比起塗裝鮮艷嘅Solar Aquarion，Aquarion EVOL嘅珍珠主色就內斂得多，只有膊頭兩塊紅甲嘅拉花較為搶眼，不過擔心珍珠色存在易變黃問題。至於活動幅度，Aquarion EVOL更加好扭，例如腰腹之間裝咗隱藏轉軸，增加轉腰角度；連接腳掌就有雙重關節，配合Die-cast製嘅小腿，接地性更佳。不過Solar Aquarion嘅可變翼，今次就因為造型優先嘅大前提下，放棄變形而改用換件，造型靚咗，但係可玩性細咗，有辣有唔辣啦！

查詢：2148 9483（精品）