闔家歡古蹟酒店草地BBQ

「綠茵裏，草坡上，讓我胸襟一再展……」

歌都有得你唱，面對一大片綠油油的草地，能令人心曠神怡，難怪天氣一轉涼，有草地及BBQ設備的郊外地方全爆滿，冇地方給小朋友玩，點算？唔使愁，移師到市區一樣有好選擇，說的是尖沙咀的Hullett House。

位於尖沙咀文物級酒店Hullett House內的餐廳Stables Grill，對出有一大片草地，平日經過，大部分人都不為意，但原來這片草地現時逢周日都會開放。於開揚舒泰的花園內供應燒烤美食，場內更設有遊樂區供小朋友嬉戲，最啱一家大細假期聚天倫。

收費大眾化

之前酒店曾在這片草地放置枱櫈給客人於戶外用餐，後來不少人提議可加設BBQ，店方於是順應民意，首度於周日在草地上開設BBQ，及添置戶外用的BBQ爐，同時設計出全新BBQ菜單，無論是沙律或小食一應俱全。收費則偏向大眾化，不用$300就可無限任食30款美食，唔夠喉的話，可額外加錢點5款燒烤主菜，肉類、海鮮兼備。

特色風味BBQ

坐鎮的大廚Vini生於斐濟，於新西蘭長大，長期與大自然為伴，特別喜愛戶外BBQ，食物方面，除了5款香腸，還有必食的迷迭香巴西豬扒和德州風味豬肋骨，前者以迷迭香、蒜蓉、百里香、胡椒及香草醃足兩日，烤香後配以特色醬汁，惹味啖啖肉；後者以自製的德克薩斯式燒烤醬、蒜蓉、百里香、迷迭香、檸檬皮、咖啡粉及Jack Daniels威士忌醃4至5天，再以慢火烤至呈焦糖面，內裏卻肉汁豐腴。

小朋友有玩有食

這個周日BBQ，其實最適合一家大小享用，因為店方特別闢出一隅作遊樂區，好動的小朋友可以玩射龍門，愛靜的可以繪畫。另外，大廚還貼心地為小朋友揀選了近10款食物，如迷你漢堡包、香烤粟米、粟米片配莎莎醬、烤香腸、香燒雞翼和迷你串燒等，以及由糕點總廚Alexis Watrin精心炮製、輪流供應的甜品，包括The Red、Banana Passion Fruit & Ginger Bar、Passion Fruit Cheese Cake和Salted Caramel Tart，名副其實有玩有食。

小朋友的燒烤美食有請熊寶寶介紹……

香腸：除了正常分量外，還有迷你版，方便嘴仔細細的小朋友。

雞翼：大廚以秘製醬汁醃製後燒香，啖啖惹味，帶陣陣焦香。

迷你漢堡包：包是自家新鮮製，漢堡扒亦由人手剁成，肉味濃又鬆軟。

串燒豬肉：豬肉不太乾身，入口Juicy，一啖一件容易吃。

粟米片：同樣是自家製，不太油膩又香脆，配以酸甜莎莎醬更美味。

粟米：粟米十分香甜，最適合小朋友補充纖維。

迷你串燒：有蝦有魚，還夾着燈籠椒，小朋友就可吃點蔬菜。

Stables Grill

日期：即日起，逢星期日

時間：12:00pm-3:00pm

地址：尖沙咀廣東道2A Hullett House

價錢：成人$288、小童$188

查詢：3988 0104

*另加一服務費

備註：另可加$118享用兩小時無限添飲生啤，或加$88無限量享用汽水及果汁。

另一精選闔家歡餐廳：自助Sunday Brunch@海風餐廳

海景嘉福酒店內的海風餐廳設有自助Sunday Brunch，自助美食除了香煎鴨肝、意式醃肉、香烤乳豬，以及一系列沙律和甜品外，更有自家製特色意粉及大廚精選薄餅。餐廳內設有兒童天地，有益智玩具及互動學習遊戲，還有小丑即場扭出新奇有趣的造型氣球，小朋友肯定樂上半天。

時間：11:30am-2:30pm

收費：成人$498、小童$298

查詢：2731 2870

*另加一服務費