法國周柏豪

最近我和同事A經常遇到法國男模Jeremy，由於樣貌酷似周柏豪（我哋認為），所以私底下都叫佢做「法國周柏豪」。

靚仔、好動、識擺甫士，令佢成為不少時裝品牌的Favourite。每次活動遇見Jeremy，佢都會給你一個熱情擁抱。就算只合作過一次，佢都記得你姓甚名誰，同你跳跳舞、說說笑。跟平時嗰啲木口木面，甚至冇乜禮貌的模特兒實在差天共地。工作經常遇到萍水相逢的人，大家未必記得對方一世，但都要感謝Jeremy的幽默，為彼此忙碌的生活調劑一下。

Keith Reporter

時裝精遇上時裝精

中國內地，Weibo世界之大，差不多人人都透過它來認識新朋友和接收最新資訊，對此，我產生了莫大的好奇感，於是開設個人戶口，同時認識了一位時裝精Janetcg，她擁有自家品牌Forchen Fortune，在Weibo天天更新每日一Look，每季親自當Model影Lookbook，有靚人着靚衫，吸引數千粉絲關注。我也試過其設計，款式不錯，大家不妨關注一下！

Candy Reporter

平靚正戶外鞋

由9月至11月，小記為了兩次旅遊、三個婚宴和看專科醫生，真真「失血」過多。其中為了籌備年度西藏歷險之旅，傷得最重。臨行前買了相機以後，自知糧草非常有限，遂為了買對禦寒的戶外鞋四出搜尋。明知這些戶外鞋笨重大舊，加上着一次後幾乎無咩用武之地，小記已將要求降到最低，不理好醜但求夠平。

最終經同事介紹下到旺角花園街，覓得Hi-Tec紫灰色中筒戶外鞋，比起大牌子下下千幾二千的價錢，加上比預期好的鞋款，標售$420實在令小記紓心不少。回家後上網查看，原來這個來自英倫的戶外鞋備有專利的ion-mask Waterproofing and Vibram Rubber Soles 功能，有外表又有內涵，希望佢喺呢個旅程可以好好守護我對腳啦！

Moe Reporter

北韓讀物《平壤水族館》

其實自己一向對北韓都好感興趣，好想知呢個似「宗教」多過似國家的人民到底是怎樣生活？除閒時上網四圍「八吓」打聽外，定時定候去三聯、商務搵北韓書已成為我放假指定動作。已入手五部北韓書嘅小弟，早前「行咇」時發現呢本《平壤水族館》，本身都想立刻畀錢拆袋睇，但當拿上手發現又是一本有關「脫北者」經歷的書時就立刻興趣大減，因為不嬲都認為由外國記者為「脫北者」撰寫的所謂「自傳」總有加鹽加醋成分，失真就無意思！但當第二朝睇新聞話金正恩用迫擊炮處決下屬時，立刻又好有衝動想買返嚟睇，因為我驚遲啲可能想睇都無得睇！

Pasu Reporter