顛覆傳統攝影觀念Lytro Camera

呢個世界有好多古靈精怪事，只要唔合常理就等如有噱頭；例如飄浮拍攝呢類違反常理的拍攝技巧，就有唔少人膜拜。其實部分攝影器材都奇異有趣，就好似有違傳統拍攝觀念的Lytro光場相機，佢分分鐘可能會改寫相機界往後嘅發展！

可變對焦點

市面上唔少相機同鏡頭都標榜自己對焦快，而Lytro光場相機卻別樹一幟，因為它採用獨有的光場技術，能夠先拍攝影像，並用軟件後製改變或另選焦點，跟傳統拍攝背道而馳。這做法可避免對錯焦，而且拍攝時絕對比人快，能夠做到零秒出手。Lytro總計提供Everyday Mode、Creative Mode及Manual Mode三種拍攝模式。簡單來說，Everyday Mode適用於一般拍攝，能夠覆蓋的光譜範圍較廣；而Creative Mode適用於超微距拍攝，幾乎能夠做到0cm微距；至於Manual Mode亦即是手動拍攝，用家可調校快門速度和感光度，更可以開啟ND減光濾鏡，減光程度達四級，非常實用。

大光圈鏡頭

外形上，Lytro似巨型唇膏，其感光元件能記錄1,100萬道光速（11 Megarays）的數據量，而且拍攝出來的影像是1:1長寬比，並有ISO 3,200感光度。操作方面相當特別，開關按鍵設定底部，而頂部的凹陷處則是快門鍵，拍攝設定全在機背的1.52吋觸控式屏幕搞掂，拍攝時可點選屏幕的對焦位置，相機就會自動測光並計算光場範圍，實試時反應相當不錯。至於鏡頭有F2大光圈，並擁有八倍的光學變焦能力，用家可以透過機頂的凸紋感應部分，輕輕用手指一掃即可變焦，就算單手持機都可以做到變焦及拍攝，如果想重播時放大影像，點兩下屏幕或掃一掃變焦感應器便可，設計非常嶄新。

影像互動上載

Lytro有紅、藍、灰三色機身選擇，由於內置記憶體，因此無需用記憶卡。原來不同顏色也代表不同容量，紅色機身為16GB，而藍色及灰色機身則有8GB。官方指16GB可拍攝約750張影像，8GB有350張，並會儲存為.lfp格式的光場相片，若然需要打印相片，就要透過軟件轉存為JPEG格式。最過癮是，用家可透過底部的USB端子，接駁行Mac OS 10.6.6或Windows 7 64-bit以上的電腦，並在相關軟件瀏覽，又或者上傳到官方網站Lytro.com，然後分享到Facebook、Twitter等社交網站；當觀賞者看到你上載的影像，更可以自由選擇對焦點，而且無需安裝任何軟件，好玩之餘亦大大增進互動樂趣！

SPEC

光場解像度：1,100萬道光速（11 Megarays）

變焦倍率：8×

光圈：F2

屏幕：1.52吋

感光度：ISO 80~3,200

體積：112×41×41mm

重量：214g

其他趣怪推介：雕花式散景圖案Lensbaby Composer Pro with Double Glass Optic

一向玩味爆燈的Lensbaby，旗下的Composer Pro with Double Glass Optic大玩「一點清」再加「拉爆」，令朦朧的地方帶有放射性效果，再扭一扭鏡頭的方向，想邊度清就邊度清，相當易用。鏡頭在對焦和做工方面極佳，擁有約50mm焦距，並特別加入對焦環讓對焦更快更準，其金屬鏡身又極為紮實，而且鏡頭對應Canon、Nikon、Pentax等主流接環，仲附送F2.8~F22的光圈葉，以應付不同的環境需要；如果乜都唔加都有F2.0光圈，概念非常有趣。擁有F2.0光圈，影出來的景深一定淺，燈光就會變成一個又一個圓形，唔少人都好喜歡呢類夢幻效果；如果想散景有變化，可以額外入手Lensbaby Creative Aperture Kit 2，入面有心形、星形、花形等多款圖案，影出來的散景就係上述圖案。

影啦！仲諗？Lomography Diana F+

講到趣怪相機，又點可以唔提Lomography（簡稱Lomo），不過好多人淨係識玩數碼Lomo，亦即是用手機Apps或者數碼相機後製的Lomo相。如果係認真玩，就一定要買部Lomography Diana F+先叫名門正宗。先旨聲明，Diana F+係影菲林，不過秉承Lomography的宗旨「Don't think, Just Shoot !」，就唔好計較菲林錢，而且菲林影的Lomo相特別有Feel，粗微粒、高反差又偏色，此乃數碼相無法做到的。Diana F+有原色和特別版，仲可以加裝閃光燈，掛上頸夠晒潮；除了Diana F+，Lomography仲有大把機款畀你揀，絕對豐儉由人。

一拉即拍全景Lomography Spinner 360

如果你試過外表好似二戰手榴彈的Lomography Spinner 360，保證你對它又愛又恨。當你以為數碼相機影全景相已經夠方便，輕輕一掃就影到180度或360度全景；點知Spinner 360的設計更獨特，只要拉一拉手柄上的金屬環，上面部相機就會自轉一圈影張全景相，而且它配備25mm廣角鏡頭，保證自拍見到樣。不過，要爽玩Spinner 360一定要付出代價，因為它轉上一圈就要用上約四格菲林，換言之一筒菲林36張大概可拍攝八張而已，完全係謀殺菲林，過癮得來都頗肉赤！

激細掌心雷Nikon CoolPix S01

呢部比手心仲要細的Nikon CoolPix S01，體積只有77×55.2×17.2mm；始終都係Nikon出品，拍攝質素都有大廠風範，佢擁有1,014萬像素，而且配備三倍光學變焦鏡頭，還有微縮模型、魚眼、玩具相機等有趣濾鏡效果。講到尾S01係賣樣，所以除紅色外，另有銀、黑、白和粉紅可選。

查詢：（a）3106 3338　（b）2926 2300　（c）2915 2205 / 2368 3230　（d）2907 1122