《Ocean Park Hong Kong》玩得有預算

適逢萬聖節，海洋公園夜晚就有得玩哈囉喂項目，官方亦趁此機會推出自家App，用家可以藉此App即時更新不同景點等候時間及表演時間等資訊，預先計劃玩園內各個項目的次序。當然也有最新海洋公園活動資訊，方便用家隨時Check住！除表演時間之外，園內地圖同交通指南亦一應俱全，就算冇喺門口拎小冊子都唔怕會蕩失路。此App亦隨時會加進各種電子優惠，下次去海洋公園之前，記得查一查有冇新優惠，話唔定有意外驚喜！

系統：iOS、Android　　　　

下載費用：免費

《Bubble Blast Halloween Edition》連鎖反應

這隻大受歡迎的連鎖反應遊戲，趁萬聖節特別推出《Bubble Blast Halloween Edition》（中譯：泡沫爆破萬聖節版），玩法大致上同以往一樣，只要用手指篤穿畫面上的泡泡，泡泡破掉後就會產生連鎖反應，並四散把四周的泡泡繼續爆破，直至畫面上的泡泡全部消失為止。不過觸碰泡泡的次數有限制，想一Take過就考你智慧。今次萬聖節版最主要係把泡泡換上得意趣致的南瓜頭、骷髏頭、惡魔頭和喪屍頭，萬聖節就到，你又點可以錯過。

系統：iOS、Android

下載費用：免費

《Halloween Live Wallpaper FREE》節日背景好氣氛

每次打開部手機都對住同一張Wallpaper，係咪覺得開始生厭，仲有少少衝動想換走佢呢？咁就要應一應節，換張同萬聖節有關的Wallpaper。《Halloween Live Wallpaper FREE》有數百款你揀，讓用家可以自行設定獨一無二的Wallpaper，當中可設定月亮、霧、天空、圍欄、南瓜火燄等等，甚至連訊號燈同倒時計都能夠設定，仲可以Set日間和夜間模式，當中的點點燈光還會自行走動，並非一張普通的硬照咁簡單，等你每次開機都有新鮮感。

系統：Android 　　

下載費用：免費

《Yumm Halloween》小心手指

萬聖節呢個狂歡夜，無人陪的確幾悽慘。只要下載《Yumm Halloween》，就會有隻奇趣無比的小怪獸Yumm同你一齊玩，而且仲係萬聖節版。玩咩？玩咬手指囉！小怪獸Yumm會張開個口，玩家只需把手指按在嘴巴的位置，呢個時候Yumm會隨時合上嘴巴，記得縮開手指呀！反應快縮得到就係你贏，如果縮唔到就會有噴血的效果，就即係你輸。隻App畫面同音效都非常逼真，而且又夠互動，等你玩手指玩足一晚。

系統：Android 　　　

下載費用：免費

《免費嚇人的萬聖節鈴聲》嚇破膽鈴聲

睇完個App個名，望文生義好明顯是以萬聖節作為主題的嚇人鈴聲，而且還是免費的，抵玩吧。入面有45款萬聖節鈴聲及聲音，還有45個以萬聖節為主題的動畫按鈕，用家能夠將這些聲音設定為默認鈴聲。第一次聽固之然幾嚇人，不過聽多幾次都依然咁嚇人，可能小記膽小吧！若然你已經換了萬聖節的Wallpaper，再加上一段嚇人的萬聖節鈴聲就最完美，但小心嚇親自己。

系統：Android 　　　

下載費用：免費

《Dr Bubble Halloween》青面博士射泡泡

著名射擊遊戲泡泡龍，相信有唔少人在街機或手機玩過，而今次介紹的《Dr Bubble Halloween》（中譯：泡泡龍博士），玩家不再扮演泡泡龍，而是一位面青青的泡泡龍博士，大家需要把三個或以上的同類圖案組合，圖案就會自行爆破。遊戲更設有挑戰模式和生存模式，前者係以過關形式進行；而後者則是挑戰自己的紀錄，直至Game Over才會完結，仲可以根據自己的能力選擇多少種圖案，物種愈多，難度自然愈高。

系統：Android 　　　

下載費用：免費