《Nike+ Kinect Training》閉門健身

Kinect嘅體感健身遊戲都有三、四款，但講到最專業應該係Microsoft聯乘Nike出品嘅《Nike+ Kinect Training》。佢巴閉在有位Nike專業健身教練在畫面上指導大家「強身」、「瘦身」或「塑身」，再針對大家測試時所展示出嘅能力去設計健身計劃，仲可以加入Nike+社群，隨時喺Xbox 360及手機App上查閱鍛煉進度。

練肌、塑身皆宜

Kinect最強係連人體關節嘅細微動作都感應得到，所以好啱玩《Nike+ Kinect Training》呢類健身軟件。由於Nike有份參與開發，《Nike+ Kinect Training》所設計嘅健身課程深度會比同類軟件強，開始時可揀主要訓練肌肉及耐力嘅「強身」；專注減重及降低身體脂肪嘅「瘦身」；或塑造身材同提升柔軟度嘅「塑身」，然後透過Tutorial測試所得出嘅體能數據而制訂健身計劃，Pro到連專業運動員都啱玩！

做錯動作 即時提示

每個健身計劃為期四周，仲可以因應自己生活習慣而決定每周健身日數。完成後可作評估，只要跟足計劃就可以Keep Fit同練到體能。健身時最怕做錯動作拉傷肌肉，遊戲軟件既會在做錯動作時，即時在畫面人像上用顏色提示外，仲有專業教練開口提你！

全部都係健身動作，會唔會好悶呢？軟件入面其實仲有迷你遊戲可玩，但遊戲會以隨機方法進行，例如有避波、跨過障礙物等迷你遊戲，畀大家寓鍛煉於歡樂之中，做到悶悶哋都有得調劑一下！

INFO

類型：體感鍛煉

開發：Sumo Digital/Microsoft Studios

平台：Kinect for Xbox 360

推出日期：10月30日

售價：$259

查詢：3071 4868

《Halo 4》特別版主機11月6日首賣

除咗《Nike+ Kinect Training》呢款健身遊戲之外，嚟緊11月6日仲有Xbox 360大作《Halo 4》，Microsoft會出埋遊戲同綑特別版主機套裝，包括有印上《Halo 4》遊戲主題圖案的320GB Xbox 360主機、兩個透明機殼特別版手掣，仲有《Halo 4》標準版遊戲同斯巴達戰士IV的裝甲塗裝，以及Avatar道具等。11月6日首賣當日會大搞限定優惠，五間指定店舖送出嘅優惠都唔同，旺角星際蘇寧送100份；HMV指定分店有100份；灣仔188金源、深水埗金源及旺角信和電氣良品都係送50份；其中最着數優惠係蘇寧首50名買家，既可得北極武器塗裝及裝甲塗裝下載卡，仲有珍藏版Master Chief連冬眠艙Figure添！

查詢：3071 4868