勁Free！《Forza Horizon》轉玩公路鬥車

對比《GT》系列，《Forza Motorsport》系列嘅更新速度的確快好多，唔使等到另一部新主機推出先有新一集玩。可是，由於要擴大玩家層面，單靠變化較細嘅賽車模擬類型係唔足夠，所以開發公司Turn 10就出多條副線《Forza Horizon》吸納更多玩家。雖然都係用《Forza Motorsport 4》嘅遊戲引擎，但玩法明顯自由得多，可以喺科羅拉多州自駕遊同接受任務，仲首次加入24小時動態時間轉換系統，睇埋日落日出都得！

揸勻科羅拉多州

試玩一輪有感：《Forza Horizon》既似再遲一星期推出嘅《Need for Speed: Most Wanted》，亦有《DiRT 3》玩越野賽車嘅影子。因為成個科羅拉多州地圖都差唔多係沙塵滾滾嘅泥路，同城市賽道、沿海山路好唔同。今集遊戲強調自由，猶如參加賽車嘉年華，可接受任務外，更要自己揸車去起點先能夠參加比賽，鍾意兜風的玩家應該好受落。抵讚之處係今集加入動態時間轉換系統，路程遠的話，由朝揸到晚，途中仲可以欣賞夕陽同明月，睇景一流！

《FM4》拉花用得番

比起好多賽車遊戲，只係注重賽車造得似唔似而忽略背景表現，《Forza Horizon》嘅背景就造得好細緻，沙塵滾滾嘅感覺出晒嚟之外，連失控剷入田野或草叢時，背景跟車輛嘅物理反應都好真實，呢方面就真係師承到《FM4》喇！遊戲本身都獲一眾著名車廠支持，仲有大量真正賽車配件可以買，鍾意自己逐樣零件更換Tune車又得，非車癡亦可以揀Auto自動化Tune車，好容易就可以將賽車升級。除咗遊戲本身有嘅賽車外，廠方亦會透過DLC形式增加各款名車，另外亦可以對應《FM4》嘅儲存檔，可以將之前花咗好多心機設計嘅車身拉花圖案加到今集上面去。

任務種類五花八門

賽車遊戲不外乎都係鬥快，《Forza Horizon》都係玩鬥唔同路段賺錢買裝備，同埋獲取高名聲解鎖隱藏比賽同任務。既然講得係基本，當然係有特別任務可玩，例如以最高速衝過超大地圖上嘅某一點，又或者要去到某個特定地點，利用影相功能影張名車加靚景相；最搞鬼係有特別任務，要揸車同飛機或直升機鬥快衝過Checkpoint，賽車遊戲中實在少有。

另外仲斟咗唔少真實「贊助商」返嚟搞咗個贊助商挑戰賽，只要完成一定次數嘅指定特技，就有贊助商畀錢你使，例如甩夠25次尾就可達到G-Shock甩尾戰Level 1資格，咁就有幾千蚊獎金買車或買裝備。所以呢，剩係揸得夠快夠定係唔夠o架，玩多啲花式先係勁，呢方面就同原本《FM4》好唔同！

Info

類型：賽車

開發：Turn 10 Studios

平台：Xbox 360

推出日期：今天

售價：$329（標準版）、$459（限定版）

查詢：3071 4868