MiPOW新品大晒冷

Smartphone功能多多，打機、上網、影相瓣瓣掂，唯獨電量問題往往是一大煩惱！有見及此，唔少廠商都推出外置電池等相關產品；其中MiPOW的外置充電池用上七彩配色搭圓柱及方柱嘅獨特外形，令人印象深刻。日前品牌就於澳門舉行「全球大會2012」，公布第四季以及來年嘅新產品，外置電池繼續有驚喜，加上仲有藍芽耳機、喇叭以及牆上插頭等新產品，十分豐富！

特色外置充電

MiPOW以外置充電池起家，Power Tube系列更於多個地區大賣，今次大會上當然都有新作推出，其中Power Tube 2600 SPM01就最搶眼，沿用方柱設計，不過就換上超醒目嘅青色及螢光粉紅色，加上白色連接插口，都幾似Lego積木。如果需要多啲電量嘅朋友一樣有得揀，盒形設計嘅MiPOW Power Cube SP8000內置8,000mAh電量，足夠叉滿一般手機約三次；機身仲內置microUSB或30針插頭，亦備有USB插頭，可以同一時間為兩件產品充電，超方便！

矜貴藍芽耳機

MiPOW亦表明今年會進軍藍芽耳機市場，新產品就有VoxTube 500以及VoxTube 700，兩者同樣採用入耳式設計，價格定位相若，前者用上圓柱筆狀設計，配合紫、銀等配色，外形討好；而後者則改用扁平形狀，設計較男性化。而最特別就要數LUZ 100，設計有點似VoxTube 500，不過表面鑲有一粒閃爆嘅Swarovski水晶，據講仲可以自己揀石訂造，啱晒高貴嘅女士們。會場另展出小型藍芽喇叭The Boom，體積僅手掌般大，亦內置咪高峰；加上藍、紅、綠、紫多種配色及復古收音機的設計，拎出街去沙灘「焚機」就最好不過。

同場加映

同場仲有多款新配件產品，包括迷你車用充電器Bolt USB Car Charger、牆身充電插頭Rotary Wall Adaptor以及二合一多功能充電座Hybrid power。另外，品牌更推出自家microUSB及USB線材，比一般原裝線材Colourful得多，同七彩外置充電器襯到絕！