貌似單反堅長炮Pentax X-5

精明的你,又點會分唔出邊部係單反,邊部係長炮呢?但全新Pentax X-5外形抄足自家的K系列單反,仲有Pentax鏡頭招牌的綠圈襯托,驟眼看仲以為Pentax出新單反!呢部疑似單反的X-5有支22.3mm Wide兼有26倍變焦鏡頭,加埋個樣,都博到唔少分數。

22.3mm超廣角

依家長炮機閒閒哋都有三四十倍變焦,X-5的26倍Zoom唔算話好突出,而且鏡頭的遠攝能力一般,不過其超廣角幾乎贏盡同級對手。市場上的相機普遍提供24mm或28mm的廣角焦段,想不到X-5卻支援22.3mm超廣角,咁Wide不論影風景同自拍都有着數,取景比別人易,加上超強烈的透視感,能夠凸顯出景物的前大後小。

鏡頭上唔單止有個象徵Pentax的綠圈配襯,仲好鬼馬加入橡膠製的「偽」變焦環,個環實際上冇得扭,也沒有變焦用途,只是其凹凸紋理有助手持更穩陣,如果有用過單反,隻手就會不期然扭幾扭!而真正的變焦桿就設置在快門位置,跟大部分DC一樣。

雙重防震系統

有些影友被稱為「石膏手」又或者「人肉腳架」,意思係手持拍攝都好似用了腳架咁穩定。就算幾定都好,始終有防震系統支援,拍攝就事半功倍。作為長炮機的X-5使用遠攝時更需要防震,所以特別落足工夫,同時支援SR光學及電子減震,前者以感光元件位移修正;後者就自動提升高感光度,以保持快門速度。X-5還提供1cm近拍,有了雙重防震的加持,焦點就冇咁易偏離。至於X-5採用1,600萬像素感光元件,最高感光度為ISO 6,400,高速連拍約每秒10張,惟相片會局限於4M至5M的大小;此外又加入了女生至愛的瘦臉濾光鏡,讓臉部看起來更尖細,絕對係自拍必備。

單反配置

所謂「做戲做全套」,X-5仲有好多地方跟足單反,例如能夠透過23萬像素電子觀景器取景,不過機身不設眼部感應器,需按旁邊的「EVF」鍵去切換屏幕或觀景器;而且機頂內置了機械式閃光燈,需要手動彈出,可惜沒有熱靴位,未能擴充閃光燈配置;至於手柄的形狀完全參照K系列單反,加上防滑的仿皮紋理及旁邊的AF對焦輔助燈,扮單反扮得相當傳神。X-5也備有上下翻揭的3吋46萬像素多角度屏幕,用來拍片最適合不過。

SPEC

感光元件:1,600萬像素CMOS

等效焦距:22.3~580mm

光圈:F3.1~5.9

屏幕:3吋46萬像素

感光度:ISO 100~6,400

其他功能:1,080p拍片、瘦臉濾光鏡

體積:120×86.5×106.5mm

重量:507g

查詢:2926 2300

Jason

$2,990