《Medal of Honor : Warfighter》真實戰爭打極唔完

《Medal of Honor》可以話係老牌射擊遊戲系列，第一代遊戲已經係1999年嘅出品。而將於下星期推出嘅《Medal of Honor : Warfighter》是第14集，由巴基斯坦打到去菲律賓再打埋索馬里，每個場景都係由真實事件改編，一落戰場就打到無停手，比上集打得更緊湊！

激戰巴基斯坦捉拉登

同上集一樣，《Medal of Honor : Warfighter》嘅任務情節乃是改編自特戰隊員的戰鬥任務，當然可能會有啲美化咗戰事嘅性質同細節，但真實感就強過憑空想像或者軍事小說的情節。新一集遊戲嘅戰場貴精不貴多，好似要深入菲律賓拯救人質，要去到海盜猖獗嘅東非索馬里攻擊海盜根據地，仲要打到去巴基斯坦同武裝分子激戰添！遊戲更會在12月中配合講捉拉登嘅電影《Zero Dark Thirty》而提供兩張電影內巴基斯坦新地圖DLC，下載費用大概800 MS Points，即約$80，買限量版遊戲嘅玩家可以免費Download，老實講近幾年戰爭遊戲場景之中，有乜吸引過捉拉登先？

各地軍隊參戰

遊戲系列主線一直都係由美軍角度出發，單人遊戲仍然係講Tier 1 Operator Preacher，講佢因長年駐守海外令婚姻出現危機，同時又要奉命解決由極度危險爆炸品PETN所帶來的全球危機，陷入顧些失彼的局面。今集所能控制的角色就由上集四位減為兩位，除咗Preacher之外，仲有美國海豹突擊隊成員Stump。遊戲又點止得美軍現身呢？英國空降特勤隊（Special Air Service）、澳洲空降特勤團（Special Air Service Regiment）、德國海陸空三棲特種部隊（Kommando Spezial Kraefte）同埋波蘭機動反應作戰部隊（Grupa Reagowania Operacyjno-Manewrowego）都會聯手出擊。

Frostbite 2.0引擎細緻度超高

好多玩家都會直接連線Online開戰，10月初網上已先釋出多人模式Beta版，忠實Fans應該早就體驗到今集嘅特點。所有任務極之緊湊，剛剛在搶灘任務上解決一班敵人之後，又會畀敵方轟炸，在一大片灰塵瓦礫中繼續應付打極都打唔完嘅敵人，啱晒射擊遊戲高手。仲有一方面要讚，就係遊戲嘅畫面比上集改進咗唔少，好似開戰時所揚起的灰塵、在空中飛起的紙張，甚至係被轟炸後樓房的碎裂邊緣都好細緻、好像真，皆因今次改用《Battlefield 3》出晒名嘅Frostbite 2.0引擎。真實感仲有來自戰場時的實際體驗，例如玩狙擊任務時，一般距離下瞄頭開槍，基本上已可以做到Headshot；不過要瞄幾條街咁遠嘅敵人時，就要自己估計埋拋物線，想要做到Headshot就可能要將準星瞄高一個頭位至半個人高咁上下，要憑射手觸覺先能做到百發百中。

類型：射擊

開發：Danger Close

平台：Xbox 360、PS3、PC

推出日期：10月23日

售價：$449（Xbox 360/PS3）、$389（PC）

查詢：3166 6001