擁抱末日音樂
瑪雅預言今年12月21日世界末日，若真的發生，驀然回首，你能說自己不枉此生嗎？年僅24歲的馬天佑（Mayao）出身大富之家，未至於享盡榮華但絕對富貴；在英國修讀時裝畢業後，便自組製作公司Fame Glory擔任美術總監，為多位潮星設計和製作唱片封套。這個自認「低能」的小伙子一直能做自己想做的事，自言今生無悔，世界末日冇有怕，只要有音樂為伴便可以了！
DIY浮誇髮癡
真正的創作人都不會理會世人目光，Mayao的打扮就是浮誇到不能，最搶眼的一頭藍髮，離幾丈遠都望得到，唔怕走失。「我上年七月開始玩漂染，坐Salon半日，啲色只係Last到一星期，索性自己在家邊染邊做自己嘢。」玩過黃色、藍色、Ash Pink等。問佢怕唔怕傷髮，「怕o架，所以成日都要做修護，生髮水都用埋！」小記踩上佢屋企做訪問，隨處可見有長有短的藍色假髮片，原來用來轉不同造型，又幾方便喎！
音樂救地球
Mayao不會樂器不懂唱歌，但就終日沉迷在音樂中，也擅長在畫面上呈現音樂的意境：「呢個世界無可能無音樂/歌，你唔使特登開機聽，齋睇廣告聽電台，湊BB瞓嘅音樂盒都有啦！」臨到世界末日時，Mayao說一定要帶儲存了79,509首歌的電腦走，「仲希望可以同一大班朋友到冒險樂園玩多轉，到時就會有UFO捉人走。」咁之後呢？「繼續聽歌囉，怕咩！」呢啲咪叫低能到死囉！
美術總監 馬天佑
龍頭戒指購自連卡佛，貪佢夠浮誇，另外兩隻Chrome Hearts戒指，Mayao說非常易襯衫，戴一世都制。
家中備有十多件眼線筆和眼影等化妝品，美男子莫若他乎。
耳環唔誇張都唔戴，至愛有吊環和金屬款式，夠墜耳先有存在感喎！
Georg Jenson鋼錶，新品原價4,000英鎊，但在英國Flea Market買到二手貨，5英鎊就成交，執到寶！
給力製作：蕭亞軒是他由細到大的偶像，能為她製作，Mayao說死而無憾；為了張芸京的大碟封面，親手用隔音棉板搭建成盒形，Feel So High；吳雨霏的水中景拍攝只花了十多分鐘，因為之前用了個幾鐘Set場。
首飾是每日指定配飾，唔戴唔安樂。上為Eddie Borgo出品，罕見透明窩釘，下為香港買不到的Chrome Hearts珠飾手鏈。
Mayao的電腦儲存有79,509首歌，是他至寶貴的珍藏，世界末日必帶走。
上網Bid的染髮劑才幾十元一瓶，說得出的顏色他都有。
自家染髮玩盡浮誇粉藍色、Ash Pink和對比色，愈玩愈過癮。
