上世紀的Boy London

早兩日，剛在友人Facebook發現呢張Boy London手錶照片時，腦裏第一時間諗起嘅唔係Big Bang隊員G-Dragon，而是一位相識超過1/5個世紀的好朋友。是咁的，話說當年這位好In好Yeah（當年都未有「好潮」呢個Term）的富貴朋友還在小學生時期，其家中已擁有無數個「Bold袋」、「M.Duck」及「喪Paul」，當然「Tim爸」同「DR.媽」鞋款都不計其數，而當年他用來襯衫的並不是「撈」而是一隻又一隻的Boy London，而家人從事鐘錶業的他更豪爽的送了我一隻，當年「小學雞」的我直頭如獲贈「名錶」一樣！如果這位多年無見的老朋友方便的話，麻煩見字後帶同一隻「原版」Boy London給本人作珍藏。

Pasu‧Reporter

鷹唇變嬰唇

秋天最怕甚麼？當然是嘴唇爆坼！尤其近日天氣開始變得乾燥，嘴唇立即「見功」，甩皮、流血統統齊晒！為了避免受皮肉之苦，當然要隨身攜帶潤唇膏，費事破損的「雄唇」嚇親人。最近公關先生就非常貼心，在秋涼之際，送來 Maybelline New York Baby Lips潤唇膏，不但能夠修護，更有防曬和補濕的功效，讓爆坼拮親人的鷹嘴都變嫩滑嬰唇！

Keith‧Reporter

填色遊戲

我自認是一個大細路，一把年紀仍沉醉於兒時玩意，家中儲落一堆洋娃娃，無無謂謂，只作觀賞之用。最近，收到Gap時裝品牌寄來的英雄人物系列的填顏色公仔簿，附送七色蠟筆一盒，原本只是一本為小朋友而設的簡單小禮物，就令我開心到飛起，我決定慢慢為喜歡的卡通人物塗上顏色，將黑白的框框變成七彩的畫冊。

Candy‧Reporter

韓國必買平"抵"鞋

小記早前到韓國旅行，收穫不算太多，但荷包輕了不少。其中一個放血站，就是集潮流與文化氣息於一區的新興購物熱點新沙洞。那裏的紐約鞋店LeBUNNY Bleu是潮人潮拜必經之地，小記就看中圖中那對燈芯絨布鞋，與當地年輕人熱捧的TOMS帆布鞋不相伯仲。前者鞋面較短小，款式更為「女仔」，穿上腳後會有修長效果，而且價錢比後者平近三分之二（約售HK$280），襯民族Look或Casual Wear都啱睇，所以即時入貨啦！

Moe‧Reporter

動起來 Move It Move It

要一個平時唔做開運動嘅人，又跑又跳，可以話同「謀殺」無咩分別，所以運動呢家嘢，一定係要自發性先至係一種享受。同事「糖果小姐」朝朝運動，我欣賞佢夠堅持，佢話運動係一種癮亦係每朝早嘅動力泉源。我信，但要我學佢，點都要開始第一步，亦是最艱辛的一步。糖果小姐為我好，推介極之漂亮有型的 Nike x Liberty 的Pepper及Lotus Jazz Collection 運動鞋，以「美麗有型」作利誘，推動我一起來Move It ！ Move It！哇！當我們穿上時，即時感到運動細胞在燃燒，家陣充滿力量，停唔到啦！

Amy‧Editor