買平耳機 一得一失

眼見編輯一擲幾千金購入四單元入耳式耳機，小記心中「葡萄」不已；但自知自己財力有限加上沒有「金耳朵」，而且最重要是本身會粗用耳機，實在唔捨得花巨款購買，所以只花$599買隻款靚兼夠Minimal嘅灰版Urbanears Plattan Plus，襯番個同樣新買、四十幾美元嘅American Apparel灰色Day Pack背囊。當然，對幾百蚊貨色無謂有太大苛求，但搭車時駁住部iPod聽下Pop Song都算過得去，暫時都叫做滿意，始終要煲耐啲先至見真章。不過世事弔詭係買入呢隻貼耳式耳機後第二日，原本用開的入耳式耳機竟然斷線，但腰間錢用完，惟有用Apple EarPods頂住檔，悲！

Brian Reporter

穿珠仔可以好破費

小編除一擲千金買耳機贈自己外，都會另擲千金冧吓枕邊人。其實小編都幾大鄉里，早前方知世上有間高貴版穿珠仔店，鏈、珠、扣、吊墜乜都有得揀，行得出門口都至少要花費一對英、美製New Balance的價錢。本人環顧店內，女客涵蓋老中青，眾人揀珠仔時盡皆雙眼放光，興致勃勃，真係百貨百客。最重要是，幫襯過一次，就會有第二三四五六七次，不斷揀珠仔為手鏈「轉款」。如閣下女伴不知此為何許品牌，就請你不要打開這個潘朵拉的盒子了。

Tony Editor

成屋啲電靚晒

靚女，大家落旺角行個轉，或打開本潮流雜誌都見唔少，但「靚電」大家又見過未，最近小記就欣賞過了。早前客廳拖板打柴，電視、PS3、藍光機全部無得用，逼住要買個新拖板！與其要買，不如買款最靚嘅，最後就揀咗Monster Green Power的MDP800，貪佢有八組輸出，可以駁齊客廳所有影音器材，更難得是能過濾電源中的雜訊及干擾，電視畫質清咗靚咗，暗畫面都無雜訊，音響啲聲都通透晒，以前的模糊感一掃而空。靚電，果然厲害。

Angus Reporter

人氣爆漫

筆者家中日本漫畫藏書超過6,000本，都堪稱「收藏家」，基本上出名同唔出名嘅漫畫都睇過晒。要講近五年最精彩嘅大作，個人必定推介小畑健嘅《爆漫》！本身日本漫畫取材廣泛已經出晒名，但就無諗過作者將漫畫家真實嘅作畫流程，完全熱血地表達出嚟，如每周排名榜及作品動畫化等，就算大家對業界不甚認識都無損追看的雅興。最近小記就買埋第20期完結篇，趁住出面齊書，未睇嘅朋友不妨買番一套欣賞，包保大家鍾意！

Alfred Reporter

「港式」拉麵有折扣

近日內地反日情緒高漲，不過港人繼續天天日本菜，真係各適其適。小記一向對拉麵有股情意結，去完記者會餓餓哋梗係又去幫襯吓，見到呢間喺旺角嘅拉麵店六點前有優惠，$37有埋汽水飲，真係堅抵，平時未計嘢飲都五六十蚊一碗啦！不過個拉麵食落就覺得比較港式，唉！算啦！幾兜嘢有得你食仲想點？

Michael Reporter