摩西分紅海《Open Sea!》

聖經故事中「摩西分紅海」相信都有唔少人聽過，故事講述摩西分開紅海，讓以色列人逃命。無論是否教徒，大家都終於有機會扮演摩西。《Open Sea!》係考驗你智慧和反應的遊戲，畫風有趣，玩家需用手指將海洋分開，而海洋有分四層，讓主角和隨行者可以渡過海洋。當然玩法唔會咁簡單，後面的關卡會有怪物追來，仲跑得好快，呢個時候玩家就要利用海洋把怪物淹沒。想做現代版摩西？就睇你救唔救得晒全部人喇！

系統：Android 2.1以上

下載費用：$9.99

信不信由你《手相大師》

測運程有好多方法，例如睇相、睇掌、星座、八字等等，不過要預測準的話就一定要搵師傅。求人不如求己，唔想遇到神棍，可以試試《手相大師》，呢個App能夠透過手機拍的手掌相片自動分析命理，識別生命線、智慧線和感情線，分析健康、性格同愛情，據稱內裏的演算法是出自資深的掌相師傅，但由於手機的鏡頭質素各有不同，加上拍攝時的光線會影響掌紋的深淺，很難話絕對準確，純粹過吓手癮則無妨。

系統：Android 2.2以上

下載費用：免費

龍年B玩競技《Come On Baby!》

龍年特別多人生B，講真，見到精靈趣致的BB真係好想錫一啖，如果你鍾意同BB玩，就唔可以唔玩《Come On Baby!》（中譯：寶貝兒來吧！）。呢個App係由經典韓國街機遊戲移植，玩家可以選擇自己喜歡的BB樣貌，仲可以連線同全世界玩家對戰，與其他BB同場對決，而且競技的項目抵死有趣，例如拋犀牛鬥遠、甩開頭頂掉落的章魚等，根本同睇緊運動會冇咩分別，最大分別就係選手變晒做BB，肯定令你睇得開心，玩得過癮。

系統：iOS 3.2以上

下載費用：免費

激射殭屍《Coins VS Zombies》

推銀仔係極好消磨時間的遊戲，之前好受歡迎，不過玩得多都有少少悶，淨係推來推去唔夠刺激。《Coins VS Zombies》其實可以算是推銀的衍生版，仲加入了射擊元素；呢隻App除了具備推銀既定模式，更會有一大堆殭屍襲擊你，手無寸鐵的你可以點做？就係用手上的金幣射佢，而射中殭屍能夠獲取金幣，最重要係每過一關就會在輪盤上出現其他特殊殭屍，讓玩家可以收集。整個遊戲的風格爆笑有趣，並不陰森恐怖，萬聖節去主題樂園玩活動排餐死時，不妨用來解悶吧！

系統：iOS 3.2以上或Android 1.6以上

下載費用：免費

捉魚高手《Fishing Joy》

對於忌水的人來說，叫佢哋深潛探索海底世界，絕對係Mission Impossible。就算你幾驚水，只要下載《Fishing Joy》（中譯：捕魚達人）就能夠睇到呢個水世界有幾美麗，畫面色彩斑斕唔在講，玩家仲可以捕捉魚類和執金幣賺取積分，更有全球成就排名和等級排名，等你同世界各地的「漁民」比較一番。剛剛接觸可能會覺得難以上手，其實App內都有新手教學指南，教導玩家一些捕魚的小竅門。

系統：iOS 3.2以上或Android 2.1以上

下載費用：免費

門逃100次《100 Exits》

如果大家有睇過以前的鬼片，應該見過門開極都未盡嘅橋段，營造一個無限迴廊空間，多數睇完之後返屋企都唔敢開門。想體驗一下開極都有門的情況，就一定要試玩《100 Exits》；此App總共有100關，玩家需要透過觸碰或拖曳的動作，設法將門口打開，前期的關卡大家會覺得易過借火，玩到後面難度自然會提升，轉數低啲都唔掂，如果解唔開謎團都冇問題，因為遊戲可以使用提示，協助玩家過關。雖然此App畫面簡約，但只要開多幾道門就會玩到停唔到手。

系統：iOS 3.0以上或Android 2.1以上

下載費用：iOS免費、Android $23.2