HiMedia Q系列手機直駁Android Media Box

上星期內地Media Box產品龍頭HiMedia推出了最新的Q系列產品，強調以Android系統結合Media產品為特色，更邀請了小記出席深圳舉行的產品發布會。其實不少Media Box產品近年紛紛改行Android系統，那Q系列產品又有何賣點？原來勝在加入了不少自家新元素，淨係手機可當遙控呢一瓣都抵讚啦！

提起Media Box，名牌推出嘅Apple TV同Nexus Q固然吸引，唔單止可以將普通電視變身智能電視，更可以將手機畫面無線傳送到電視機放送，就算Media Box內無片源都可以喺手機上邊搵。而HiMedia Q系列的Q5都絕不怕比下去，其特別之處在於設有HiShare技術，只要下載同名App到智能手機，就可以做到喺電視上播放手機內嘅影片、圖片同音樂，真係唔記得駁外置硬碟唔緊要，無NAS亦唔緊要，最緊要手機有片，就可以駁出電視播，方便在唔使搞一大輪設定。

智能手機變遙控

除操作可有如Air Play功能一樣之外，HiMedia Q5今次最特別係可為手機安裝HiControl程式，只要一經安裝，任何iOS或Android手機都可以當成HiMedia Q5嘅遙控使用；之前同類型產品最多都係跟隻「飛鼠」畀你用嚟當滑鼠操控，而裝呢個App就可以虛擬遙控、滑鼠、觸控和鍵盤等操作，最正係支援埋體感操作，用佢好似Wii咁玩賽車遊戲都得，就算打普通Game當手掣用都好開心啦！

播片快得緊要

由於今次HiMedia Q5再唔用Realtek晶片，改用ARM Cortex-A9處理晶片，雖然播片功能方面暫時未能2D轉3D，不過對Android嘅支援就好過之前多多聲，包括IPTV、HiTV功能都可以完全整合到Android系統內，而且播網上視頻更加比之前流暢得多，其「快轉功能」幾乎等如一轉即播，加上本身Time Bar「快進功能」，感覺就好似用電腦一樣，而且Android本身對瀏覽器都支援得非常好，HTML5動態網頁完美支援外，打字又有螢幕鍵盤，亦可以用手機打，真係好似操作家中的HTPC一樣，能給用家一個完全唔同嘅體驗。

小評測：流暢至極

播放IPTV測試，不論轉台抑或揀台都非常流暢，畫質亦不俗，媲美直接收看電視台。

HiMedia Q5 SPEC

處理晶片：ARM Cortex-A9 1GHz

記憶體：1GB DDR3/4GB NAND Flash

介面：SATA、USB 2.0、SD/MMC/MS三合一讀卡器

尺寸：170×155×24.5mm

查詢：3586 2208