芒亨神物山口式雄火龍裝
《Monster Hunter 4》成為日本東京遊戲展2012嘅風頭躉，試玩攤位日日排長龍，呢股風潮亦都席捲玩具界，新推出嘅山口式「男劍士雄火龍裝」以精緻雕功及塗裝，加埋一把長達17cm嘅「炎劍利奧雷烏斯」，擺出大劍姿勢型到痹！
起晒角照擺Pose
「雄火龍裝」屬於早期《芒亨》作品中熱門嘅砌裝組合，今次山口式無論模件質感及細節雕功，都交足功課、誠意十足，好似紅色鱗甲表面紋滲足黑線，更顯層次，至於頸位、胸、腕及大腿嘅銀甲表面，擦上薄薄一層啡紅色，模擬生銹效果。由於裝甲角位多，為免影響活動能力，所以加咗好多額外關節，包括前裙甲有獨立Ball Joint、兩側裙甲又有二段Ball Joint等等，可到做到紮馬、壓腿等動作；面罩、頭盔、頸甲嘅分件關節，確保頭部可以左右轉動外，又可以大角度垂低頭扮Cool。
武器漸變色塗裝
至於兩款有型武器—大劍「炎劍利奧雷烏斯」，以及片手劍組合「烈焰之刃」跟「雄火龍盾」，前者刀身長達17cm，比Figure本體仲要高，啡色龍角嘅表面乾紋，營造鈣化感覺，末端龍牙刃身亦有銹迹漸變效果。「雄火龍盾」背部嘅深啡色皮革，就噴上光油表達出光澤質感；片手劍「烈燄之刃」嘅龍牙劍身中央噴咗鮮橙色，兩側就混集咗漸變黃及漸變灰黑兩種色，營造似模似樣嘅火燄效果。
查詢：2148 9483（精品）
Revoltech Yamaguchi No.123 Hunter—男劍士雄火龍裝 $280
肩甲係獨立零件，可以自由轉動，令頭盔尾端跟肩甲唔會互相頂住。
每塊裙甲都有獨立關節，可因應下盤姿勢擺位而隨意展開。
「炎劍利奧雷烏斯」嘅巨大刀身滿布紅色鱗片及頭角，夠逼真！
腰間嘅皮包造工精緻，縫線位、皮扣等細節一應俱全。
盾背嘅把手位置似足皮革，表面塗咗光油增加光澤度。
片手劍「烈燄之刃」嘅劍身中央噴咗鮮橙色，兩側呈現漸變黃，模擬鑄造效果。
手掌備有獨立關節，令掌心可以前後扳動，勉強做到翹手動作。
片手劍跟護盾組合勝在攻守兼備，係雄火龍套裝嘅必備配置。